【台慶頒獎禮】馬國明繼續陪跑 講視帝好葡萄:喜劇都唔係攞獎戲

撰文:
最後更新日期:

馬國明預計自己又陪跑,今年睇好陳展鵬、郭晉安和王浩信拿視帝。(何志衡攝)

無綫《幕後玩家》玩完,接住播放的《流氓皇帝》終於讓觀眾心情輕鬆一下,之但係男主角馬國明就未必咁輕鬆,事關過幾日(18日)便是台慶頒獎禮大日子,馬國明只憑《為食神探》便同廖啟智、黃宗澤、黎耀祥等爭視帝,唔通今年又陪跑?

馬國明今日為宣傳《流氓皇帝》出席花車巡遊,由中環遊到西環,他全程保持微笑卻沒有表現得很興奮,而途人要求合照他都有求必應。問他有沒有信心贏視帝,他毫不考慮便回答:「冇,我好隨緣,其實呢兩年我都好隨緣,首先上年《梟雄》我係客串,今年我啲劇都唔係啲攞獎嘅戲,係大家笑完就算嘅戲。大家心照,有啲戲好似賀歲片咁,笑完攞個氣氛,唔會攞獎囉!所以今年當開party囉!」

【無綫台慶頒獎禮.專頁】

馬國明、黃智雯等坐巴士塗裝的花車,由中環巡遊到西環宣傳《流氓皇帝》。(何志衡攝)

正所謂「一理通馬國明」,講到尾公司叫你拍什麼就拍什麼,無得say no!他愈講愈明,愈講愈酸溜溜:「可能公司想訓練我拍喜劇啦!其實我對演喜劇冇乜信心,但作為一個演員又應該咩都磨練下,唔可以話避咗唔拍,同埋難得仲喺TVB,TVB係好好嘅學校,無論你套劇收視幾差幾多人鬧你都好,你都仲有機會拍戲,但到你將來出咗去就唔同喇!你一兩套死咗就真係拜拜。」他繼續講:「你諗下拍喜劇有幾可攞男主角(獎),周星馳有冇攞過男主角獎?將來有機會出去嘅話咩都要得,唔通到時先話唔識拍喜劇咩。」馬國明前後講了兩次將來離開TVB,愈講愈心酸。唔使擔心喎,周星馳《少林足球》其實攞過金像獎影帝,不過都係離開電視台之後嘅事!

馬明新劇被cut至得17集。(網上圖片)

沿途派海報及有市民要求合照,馬國明、黃智雯等都有求必應。(何志衡攝)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。