TVB小生丁子朗早前因一條飛機機艙短片，意外捲入「炫富」「歧視窮人」風波，被中港兩地網民一面倒圍攻，形象插水。事源他於社交平台上載片段，開首以「如何度過10小時的經濟艙？」作招徠，結果畫面一轉卻變成在商務艙安睡，再配上「唔好坐經濟艙」等字句，被批「玩笑過火」、欠缺同理心。

丁子朗指大家價值觀不同

今日（9/3）丁子朗、吳若希和戴祖儀現身電視城出席無綫全新綜藝節目《他們的澳洲駕期》宣傳活動。丁子朗接受《香港01》訪問時表示：「其實件事發生咗之後，我哋一齊共同進行，我哋有傾過點樣好呢？而佢哋兩個咁聰明，咁所以就快就處理咗。（公司有冇叫你慎言？）又冇叫，但呢個都係一個提醒嚟。」

丁子朗續說：「明白到唔同嘅平台有唔同嘅尺度，亦有唔同嘅觀眾同文化。其實一直都好多留言都好正面，只係某啲平台觀眾嘅風氣，睇嘅價值觀唔相同，呢個的確係我哋忽略嘅一點，但我哋唔可以因為忽略咗令到一啲人唔開心覺得冇所謂。我哋都覺得唔好意思。但我哋主要都希望大家專注呢個節目。」