莊思明今日（1日）出席《愛·回家之開心速遞》愚人節活動，與劇中一眾演員齊齊玩遊戲。問到可曾在愚人節整蠱人或被整蠱時，莊思明說：「通常我被整蠱嗰個，試過俾黎諾懿將啲咖啡豆倒入我對鞋同袋入面，嗰次我趕住走，着對鞋時就諗點解有嘢喺入面？佢哋係幾個加埋整蠱我，不過我無嬲，已經慣咗。我自己就試過收埋阿楊（男友楊明）啲嘢，係重要嘢嚟，唔記得咗係銀包定係電話，佢搵咗好耐，之後我擺返喺一個位置當係佢搵到。」

同居生活與結婚無分別

提到早前提及與楊明今年會結婚的計劃，莊思明就表示：「我無講過呀，係佢講，我都唔心急，反而係身邊啲人急過我哋。（拍咗拖10年好耐喇嘛）今日就係拍拖10周年紀念日，我哋嗰時係3月尾一齊，都唔記得咗係幾好號，就話咁揀個易記嘅日子啦，就定咗喺4月1日。（你未想結婚？）我又唔係真係人哋講到咁想，其他人更想我哋結婚。其實我哋一齊住同結婚無乜分別，結咗婚都唔會有好大轉變，結婚只係搞個大party同啲親友一齊開心。（婚紙有保障？）咁結咗婚都可能會離婚嘅，我哋兩個又唔係豪門第時離婚會分家產。而家我嘅起居飲食日常生活都係佢照顧我，佢好捨得使錢喺我身上，使到我叫佢唔好使咁多喇。我覺得一個人愛唔愛你係睇佢平日生活上點對你。（需唔需要佢求婚？）佢話一定要求婚，我本身鍾意儀式感，佢話如果唔求婚驚我第時老咗會怨佢。佢會諗驚喜畀我，但係啲fd成日篤爆，佢又要再諗過。（如果今年結婚你ready？）我ready嘅。」