林明禎前幾年是廣告及電影商寵兒，憑著可愛性感形象加上半鹹淡廣東話吸引不少人支持，賺到豬籠入水。不過自從與呂爵安（Edan）傳拍拖後，似乎流失了不少粉絲，還惹來了一些haters。林明禎日前度過了36歲生日，她飛往意大利慶祝，穿著超透薄貼身小背心與牛仔褲在街頭拍片，片中見她心情大靚非常風騷，穿梭橫街窄巷又彈又跳，展露玲瓏浮凸身材及曲線美。

不過有部份網民就批評她「扭身扭勢」、造作、姣、假等等，幸好也有一堆網民留言力撐：「講真我有佢咁嘅身材我都會係咁扭身扭勢」、「我係女有咁嘅身材何止扭身扭勢，我做湯瑪斯盤旋添呀」、「唔該女人唔好攻擊女人啦好嗎 啲酸臭味出晒嚟」而林明禎相隔幾日就以簡單16字反擊酸民：「你們繼續酸酸 我繼續發光💫哇哈哈哈哈」展示強大心理質素！