「傳奇綠葉」鬼塚最近有份為無綫（TVB）新劇《非份之罪》做宣傳，他亦乘勢開設內地社交平台抖音帳號，準備進軍內地市場。第一條片他就與自己的保時捷愛驅一齊出鏡，非常有型。

開創時裝王國風山水起

鬼塚11歲時在洋服店做學徒，曾經做過車行等各行各業，份份工都被炒，到1985年才開了第一間自家品牌「鬼塚」，成為傳奇時裝設計師，更造衫造到風山水起，家中「波子」、Benz、MGB等名車擺到行唔郁當擺設，80年代一炮過用138萬現金買起九肚山洋房，但03年卻一夜結束整個與他同名的時裝王國。

曾貼錢返TVB

2017年鬼塚加入TVB做演員，直認是打發日辰，更是貪慕虛榮：「我2003年退休，係近年先苦苦哀求個朋友話想拍劇，佢係TVB導演嚟，於是叫我入紙申請，點知入紙一個星期後就有回音，《乘勝追擊》係我第一套拍嘅TVB劇，得一個Shot啫，做收數佬，做完之後嗰啲虛榮心即係返晒嚟！」擔任TVB演員時，鬼塚試過揸保時捷靚車返工，後因座駕泊在電視城門外遭抄牌，變相倒貼打工，令同劇台前幕後感到震驚：「咁有米都做茄哩啡」。