黃仁勳出軌七師傅稱「所有男人都會」 AI股將出事勸勿撈貨NVIDIA
七仙羽(七師傅)昨日(15日)出席慈善活動,曾任財經記者的她,受訪時期間講到近日NVIDIA創辦人黃仁勳因出軌而辭任CEO一事,她指自己知很多,但不想多講,因為太敏感,又認為:「所有男人都會出軌,只不過窮係冇錢,身痕,想出軌都出唔到。」醜聞連累NVIDIA股票近日暴跌,不少股民叫苦連天,但亦有人認為低位是入手好時機,七師傅就勸:「好多人話快啲撈貨,事情明朗化,快啲衝入去買,梗係唔係啦,諗嘢咁簡單咩?」她預言AI股、科技股明年1月後有其他問題,叫大家「唔好咁快衝入去」。至於日前Microsoft 旗下Outlook大規模停機,七師傅預言12月將再發生同類事件或大停電,提醒大家買定電筒及後備照明,電子產品亦要叉滿電以備不時之需。
七師傅論出軌誘惑 直言人性難抵擋:所有男人都會出軌
先講到黃仁勳出軌熱話,七師傅認為所有男人、女人都有機會出軌:「所有人都會出軌,男人會出軌,女人會出軌。任何一個條件好嘅男人或者女人,出現喺你面前,你都會頂不住誘惑,因為人都係人,人係有缺點,佢出軌並不是好大嘅問題,因為所有男人都會出軌,只不過佢係一個名人,關注度喺佢身上。其實我身邊好多男人有好多個老婆、女朋友,大家都見到有錢男人身邊都好多女人啦,呢啲就係人性,所以大家唔好挑戰人性。」
自爆老公曾遭異性勾引 稱不怕小三小四:我會渡化佢哋
被問到若先生出軌怎麼辦,七師傅坦言老公條件好,多年前已有錢、高大、哈佛畢業,所以二人拍拖時有很多女人對他有興趣,甚至傳訊息勾引他,但他根本不介意:「金子就會發光,係金就會發光,我越係唔介意,我唔理,我老公就更加覺得我特別。」七師傅對自己有信心,自言溫柔、性格好、善良,之後說:「我個樣又唔係差……即係亞洲又唔鍾意我啫,外國人鍾意我呢一類㗎嘛,咁我身材都OK啦,我個樣……」但她突然失笑語塞:「唔知點形容,亞洲人話唔靚,外國人話好靚。」七師傅認為有自信的女人,不用打敗小心,自然都會贏,認為若老公是世界名人身家豐厚,或許他都會出軌:「我唔介意,我會共存,我嘅心態就係共存,我要渡化,萬一老公有小三、小四,我會渡化個小三、小四,加上我識好多magic,一路渡化一路懲罰,要令到小三、小四,知道唔可以破壞人哋家庭。」
斷言今年不會爆疫情 勸市民毋須恐慌囤糧:大家又唔係老鼠
目前已接近年尾,問七師傅香港來年如何,她強調不會有疫情:「之前大家都話會有疫情,話今年有疫情,唔會㗎,話俾大家知一個秘訣,大家都傳嗰樣嘢,就算嗰樣嘢應該發生,都唔會發生,因為破咗喇,破咗天機就唔會發生。如果係幾個人傳,就有機會發生,但係全球都傳,就唔會發生,就會有另一個plan,呢個係宇宙嘅規律,佢唔會咁易俾人世間嘅人知。」月前不同國家的人都說要「儲糧」,令不少人人心惶惶,七師傅就說:「大家又唔係老鼠,儲咁多糧做乜嘢?因為你儲太多糧,又冇地方擺,加上都會變壞,大家唔好俾自己咁大壓力,今年係唔會有疫情,你信我啦!我次次預測有幾次係錯?我次次預測都準,之前預測啲名人有啲咩事,都中咗,我知好多好多嘢,我唔敢講咋嘛,講完之後好麻煩。」
NVIDIA股價急挫叮囑切勿撈底 預言明年AI股科技股震動大
不過,七師傅特別提醒大家留意股市,指出年第一個月冇事,但之後有大震動!講到近日NVIDIA股價受黃仁勳出軌消息連累而暴跌,七師傅特別叮囑大家不要以為事情明朗化就趁低吸納,勸持續觀望:「好傷㗎,呢隻股票都會影響其他AI股同科技股,暫時大家觀望,唔好咁快衝入去。身邊好多人話快啲撈貨,事情明朗化,快啲衝入去買,梗係唔係啦!諗嘢咁簡單咩?因為佢之後都會有其他風浪,因為大家睇呢個股票唔好睇得咁簡單,唔係淨係咁簡單一隻股票,好多因素㗎,所以大家唔好咁快衝入去,之後科技股、AI股都會有其他問題,大家唔好咁快衝入去。」
12月或再發生全球死機 提醒小心大停電及網絡詐騙
日前Microsoft Outlook全球大規模停機,七師傅指12月份會再有類似情況,亦提醒要小心大停電:「大家要小心啲留意吓,平時自己屋企都準備一個備用電筒,充電,我建議大家成日都要充滿啲電,因為有時突然間你冇電,充唔到電喇喎,所以充晒啲電先!」她又表示要有網絡安全意識,因為網絡詐騙多,自己一日都受很多詐騙訊息,例如假賬戶問她睇風水收幾錢,又或是謊稱住她樓下,投訴她單位漏水:「我心諗,我樓下?我已經住一樓,樓下冇屋,好多呢啲詐騙。」