周潤發睇BIGBANG獲GD點名致謝 爆無得揸機自拍:我自己機都唔得
韓國天團BIGBANG一連四場香港演唱會早前圓滿結束,吸引不少圈中名人捧場。日前(17日)尾場演出,權志龍(G-Dragon)在台上特別點名多謝周潤發(發哥),並以「Forever young super star(永遠年輕的巨星)」來形容發哥,引來全場哄動!今日(21日)周潤發(發哥)率領黃浩然、蔡一智等星級跑友出戰「樂施毅行者2026」新增的「樂施會50周年限定版」20公里賽事,發哥透露當晚亦有到現場睇BIGBANG演唱會,更大讚好睇!
周潤發大爆後台規矩嚴格 無得揸機自拍:我想攞住我自己機都唔得呀
對於被GD大讚「Forever young」,發哥聽罷即發揮一貫幽默本色,笑指:「加埋都唔夠我犀利呀!」發哥透露今次是獲邀入場睇騷,更大爆後台規矩嚴格,「無權」揸機同BIGBANG自拍留念:「喂,架機喺佢經理人嗰邊㗎喎!我想攞住我自己機都唔得呀!係呀,要大會機呀!喂,你打電話畀周太,周太有應該,其實我陪周太去咋嘛!」 被問到周太最喜歡BIGBANG哪一位成員時,發哥秒答「三個都鍾意,佢係唔鍾意我啫!」逗得全場大笑。去年11月,周潤發在MAMA頒獎禮親手將年度藝人大獎頒給GD,自此兩人未有再見面:「冇呀冇呀,佢哋都忙啦!」
GD曾多次公開多謝發哥 兩度MAMA頒獎同台
其實GD過往曾多次公開表示視發哥為偶像,更形容《英雄本色》中「Mark哥」一角啟蒙了自己的舞台藝術表達,二人甚有淵源,早於2015年Mnet亞洲音樂大獎(MAMA)上,發哥已親自頒獎予BIGBANG。去年發哥再在MAMA頒獎給GD,兩人再次同台,GD更在領獎後分享與發哥的後台合照,延續多年交情!