方力申游上岸凍到震大肚葉萱體貼攬實送暖 承諾:老婆我唔再游嘞
現年46歲的前香港奧運泳手兼藝人方力申(Alex),繼2019年完成香港環島泳後,昨日(21日)再創歷史壯舉!他領銜的「凝動全城 破浪傳承:方力申港澳慈善游2026」清晨由大嶼山下水,挑戰橫渡長達35公里的港澳公海海域,最終以8小時37分24秒到達終點,不僅籌得高達1000萬善款,更獲得國際權威認證!
破健力士紀錄籌千萬 趕赴群星音樂會
小方今次以驚人意志完成挑戰,大會正式宣布他一舉刷新港澳橫渡最快紀錄,更正式獲健力士世界紀錄TM認證為「香港至澳門游泳用時最短(男性)」!而今次慈善游埋單共籌得1000萬善款,成績斐然。最令人敬佩的是,小方上岸後雖然體力透支,但他仍馬不停蹄,隨即趕往參與「浪接浪港澳群星慈善音樂會」,絕對是出心出力。
過程極度艱辛 呻頭痛無知覺向老婆作承諾
雖然成功創下世界紀錄,但過程絕對有血有汗。方力申接受U Channel訪問時,親述今次挑戰辛苦到差點頂唔順,更嚇怕向太太葉萱承諾「收山」!小方直言出發前太太已極力反對:「本來太太唔俾我繼續游,佢話仔細老婆嫩,我話唔得嘅,被需要感覺嘛,有人需要我就要出嚟㗎啦!」 但落水後方知真實環境極度惡劣:「但我游緊嘅時間,根本實在太辛苦,雖然我直線35公里,但我可能游咗40公里,同埋中間四小時水溫變到好凍,雙腳又冇知覺,又頭痛。嗰刻我已經同自己講,唉,老婆我唔再游嘞!」
大肚妻體貼送暖 囡囡超萌舉動融化網民
當小方捱過難關上岸後,明顯凍到震兼未有即時着衫,但他仍堅持在計時鐘前與媽媽、弟弟、太太葉萱及囡囡Isla拍攝全家福。剛宣布懷有第二胎的葉萱盡現體貼本色,一手抱實囡囡,雙手緊緊攬住小方雙臂為老公取暖;而囡囡Isla的小手亦極度自然地搭實媽媽的手,畫面極度溫馨。
這張「一家四口」的合照隨即在網上瘋傳,有網民發帖激讚:「方力申個bb笑4,主動搭上去😹😹欣賞方力申,真身體力行😳」。不過,這張溫馨合照竟意外引發一場「錯視」小風波。有網民留言提問:「請問太太右(手)抱住BB,咁佢左邊隻手係佢老婆,咁方力申右邊果隻手係邊個?...佢太太有三隻手」。面對這個搞笑疑問,隨即有眼利兼有湊B經驗的網民出面拆解謎團:「佢老婆右手抱住bb再同時手掌扶Alex右手臂」、「個B係坐住喺媽媽嘅手上面夾住,有小朋友嘅人都識咁做」,完美解開「第三隻手」的惹笑疑雲。