【萬千星輝頒獎典禮】陳展鵬做地盤日賺$350 出爐視帝:97最難捱

撰文:
最後更新日期:

21年終有出頭之日啦!陳展鵬在台上自言難忘過往迷失日子,但仍感激不同人給他機會。(梁碧玲攝)

上呀!陳展鵬做過地盤,又學過功夫,相信因為咁,他在《城寨英雄》有多個打鬥鏡頭,都唔怕辛苦,發揮得好好。

陳展鵬成為新鮮出爐視帝!他在台上講到由訓練班到現在,經歷過好多迷失日子。的而且確,陳展鵬入行21年,演藝路曲折離奇。中學畢業後參加無綫電視藝員訓練班後,試過跑龍套,登過電影大銀幕,做過小小角色。其後他受到著名音樂人蘇德華賞識,簽過8、90年代最勁的唱片公司寶麗金,曾經出過4首歌。惟歌手路稍為不順,碟都無出,就要被公司放棄。之後2002年加入亞視,拍劇都有做過下主角,但點唔夠入TVB多人注意!煎Pan 2008年加入TVB後,由《情越雙白線》開始,就得到觀眾留意。《讀心神探》、《真相》、《巨輪》、《張保仔》,以及《城寨英雄》裡的表現,統統都得到觀眾不少好評,走到今日奪得視帝一獎,的確係唔容易!

不講不知,原來陳展鵬做歌手的期間,遇上了97金融風暴,香港經濟低迷,唱片業也無可避免地無得出,所以做歌手的展鵬當時幾乎零收入。回想起過往21年,展鵬也不避諱講到97年確實是他人生最難捱的時期:「其實行行都難捱,我諗我都好似跟住香港一齊成長、一齊起一齊落。」煎Pan當時難捱到曾經落地盤做工人賺外快,一日收入有350蚊,最瘋狂試過連續工作兩星期。他後來再講到:「做地盤都唔係維持咗好耐,但嗰段時間自己都真係好迷失,又唔係師傅,拎住個箱行來行去。」其後煎Pan間中返國內拍劇、電影,為了有一技旁身,曾經跟過冼灦英師傅學功夫,可見陳展鵬捱過後,變得刻苦耐勞。相信《城寨英雄》左勾拳一角,使陳展鵬可以大展身手,同時讓他有很好的發揮。

陳展鵬如今獎已拎,唔知愛情又幾時有著落呢?(梁碧玲攝)



請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。