律政強人|曾獲廖啟智提攜教演戲 李佳芯:佢一句說話令我醒咗

撰文:
最後更新日期:

李佳芯(Ali)主演的醫療劇《白色強人》當年收視亮眼反應熱烈,卻被飛起無緣拍攝續集《白色強人2》,令不少觀眾大感可惜。日前唐詩詠在Instagram疑似以「我們仨」的字眼發文,令不少網民猜想是不是暗示Ali即將以三姊妹姿態回歸,詩詠更親自回覆:「會回來的,相信,我一直也抱住希望」。Ali今日(12日)現身將軍澳電視城出席劇集《愛美麗狂想曲》宣傳活動時,卻親口粉碎了回歸傳言:「我冇收到任何消息同通知啊,原來佢(唐詩詠)係先知!同埋佢哋先至拍緊第二輯,照計唔會咁快定第三輯,或者有冇第三輯都未知。」她亦表示未有收到任何會在第二輯中客串的計劃,但可能會將她於第一輯中生死未卜的角色Kennis的片段當成回憶來作剪接。

李佳芯換上私伙睡衣出席以睡衣派對為主題的劇集宣傳活動。(梁碧玲攝)

除了八點半見到Ali在《愛美麗狂想曲》中的演出,她首部主演的劇集《律政強人》近日亦因為要紀念因胃癌病逝的廖啟智而放在翡翠台深宵時段重播,Ali坦言智叔當年幫助了自己很多,亦教了她很多作為演員要學的道理,講着講着雙眼也變得通紅:「我而家每晚都準時睇《律政強人》,真係愈睇愈掛住佢(廖啟智),亦勾起咗好多同佢合作時嘅點滴,我有少少覺得可惜嘅係我當時同佢嘅對手戲唔算好多,但係某啲說話已經令我好印象深刻。」

李佳芯和廖啟智曾於2016年合作拍攝《律政強人》,該劇同時亦是Ali首部擔正的劇集。(梁碧玲攝)

她憶述當年的她演技仍然很稚嫩,有一場戲有個攝影機一個鏡頭要離遠影過來,智叔在那場戲之後馬上提點她:「佢同我講咗句就係話,『一個好嘅演員做角色嘅時候一定要留意個cam(鏡頭)喺邊,除咗要演好你啲戲,講好你啲對白,做好自己角色之外,同時要有對眼望住個cam,個cam喺邊度嚟,你要有個意識要搵同埋配合個cam』佢咁講完之後我當時覺得『係喎!』當時嘅我做戲只係掛住背好句對白或者做好個角色,但係完全忽略咗外在嘅嘢,包括對手、機器器材、燈光等等。原來一個演員要睇嘅嘢要係好闊,就係佢當時呢一句說話令我醒咗一醒,唔係做好自己就得,一句好簡單嘅說話,我今時今日都記得。」

Ali表示智叔從來不會批評後輩,亦不會講一些不好的說話,只會在適當的時候作出適當的提點。(截圖)

該劇集雖然是Ali首套轉型做女一的作品,但當時智叔已經獨具慧眼公開大讚Ali有潛質奪視后,結果Ali果然在兩年後憑《BB來了》大熱奪視后寶座。可惜Ali和智叔完成《律政強人》之後已經沒有再見過面,亦沒有親自聽到智叔的祝賀:「嗰次合作之後真係冇(聯絡),可能我個人都幾自閉,完咗套劇慶功會有交流有傾偈,始終佢係一個前輩,我又唔係好主動去搵佢。但好開心有個前輩咁睇好自己,對我哋呢啲咁新又冇自信心嘅後輩嚟講,係畀咗好多鼓勵同信心,真係好感激佢!」

睇埋今日活動着睡衣登場嘅Ali:

+2
+2
+2

同場加映:律政強人︱李佳芯首擔任第一女主角 跳出「狐貍精」框架獲肯定

點擊下圖觀看李佳芯演過幾多次衰女人、狐貍精:

+6
+6
+6


請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。