姜濤忙到冇時間休息　演唱會後昏迷一日：真係太攰！

男神姜濤演唱會後依然做到無時停，早前他接獲眼鏡品牌的邀請，到位於K11 Musea分店拍攝廣告。首次接拍太陽眼鏡廣告，姜濤原來對太陽眼鏡是有一套情意結。姜濤︰「我父母本身都好鍾意戴太陽眼鏡，我記得我人生中第一副太陽眼鏡，就係細細個同媽媽去加拿大旅行，嗰陣時覺得外國人都好鍾意戴太陽眼鏡，所以嗰時媽媽就喺海邊嘅一間小舖頭買咗副太陽眼鏡俾我，我整個旅程都有戴住，覺得自己變成外國人咁。」而小時候的姜濤，對於選擇太陽眼鏡，亦有他的一套「心得」。姜濤︰「我記得嗰時我係揀一副鏡面好大副，因為覺得同一個價錢，鏡面大啲感覺抵啲。同埋我成日會借媽媽嘅太陽眼鏡嚟戴，細個覺得太陽眼鏡係無分男女裝，所以戴女裝眼鏡都無問題。」

姜濤在演唱會後依然工作接工作，幾乎極少休息時間，問到如果能放一日假，他最想做的竟然就是瞓。姜濤︰「我喺演唱會後都有休息過一日，嗰日就真係全日喺屋企瞓，起碼瞓咗十幾二十個鐘。雖然內心係想起身做吓其他嘢，例如睇電視或打機，但真係太攰，最終都係昏迷咗咁瞓咗成日。」