鄭欣宜被讚上鏡謀殺菲林竟不滿 許廷鏗：你啲中文未夠好
撰文：吳子生
出版：更新：
許廷鏗透露曾嫌棄自己腳粗，所以不會穿著短褲。（陳順禎攝）
許廷鏗（Alfred）和鄭欣宜（Joyce）今日（17/6）現身中環出席服裝品牌新店開幕儀式。講起衣著打扮心得，Alfred就表示：「我以前有個要求，就係著褲唔好露腳眼同膝蓋，係因為怕自己隻腳粗唔好睇，所以好抗拒著短褲。不過而家呢個界限就冇咗。係因為我自從拍咗呢個廣告之後，發覺著短褲原來係咁舒服，咁所以幼腳咪著幼褲囉，粗腳咪著粗褲囉！」
許廷鏗和鄭欣宜今日出席服裝品牌新店開幕。（陳順禎攝）
提起近來升呢做攝影師，Alfred表示完全多得Joyce的鞭策所至：「其實我係有影吓相，但唔算稱得上做攝影師嘅，但我係鍾意影相嘅，而起初我影相係影Joyce先嘅，不過佢就成日話我影得差。就係佢嘅推動力，成就咗我半專業攝師嘅身份。好記得之前無論咩時候，佢一擺甫士我就會係咁影，講真佢都幾謀殺菲林嘅。」而身旁Joyce反應好大話：「咩謀殺菲林呀？」Alfred急忙解釋話：「意思係話你捉咗好多菲林去，係好事嚟，唔係殺咗啲菲林，你啲中文真係未夠好。」Joyce聽完解釋後即時開懷大笑。