【勁歌金曲】胡鴻鈞澄清沒有與吳業坤不和:仲有好多友情可以消費

撰文:
最後更新日期:

近日「巨聲幫」的吳業坤、胡鴻鈞(Hubert)、許廷鏗(Alfred)等突然鬧出「不和之說」,有報道指坤哥囂張到冇朋友,要孤獨慶功。老老豆豆,鬧不和其實都幾老土,因為藝人多數都會例牌否認。而Hubert和坤哥的澄清方式,不單止用口講,兩人更在今年《勁歌金曲頒獎典禮》上和JW王灝兒一齊將友情「擺上台」,三人在台上互相支持對方唱歌,力證感情要好。

坤哥、Hubert和JW在勁歌上演友情戲碼。(黃國立攝)

完騷後Hubert接受訪問,一聽完關於坤哥的問題後,他即說:「我唔想益咗坤哥,明明係我嘅訪問,做咩要講坤哥喎。」好似好寸咁喎... Hubert續說:「係大家覺得我哋係好朋友先會傳不和嘅,但的確呢段時間大家都各有各忙,大家都要拍劇,的確係見面時間少咗,但並非外界所傳話我哋鬧不和。」原來開頭只是開玩笑,嚇死朕咩。

講到多次約食飯都不成事,Hubert就話每次約食飯坤哥都要工作:「我真係有上網睇睇有冇乜嘢蛛絲馬跡,確認佢有冇講大話。」Hubert講完之後,更笑住自認小心眼。其實有時友情就是這樣,夠膽互寸才是真好友。

其實兩人都老友鬼鬼嘅。(梁碧玲攝)

談到今次勁歌兩人各有一獎,大家叮噹馬頭,Hubert聽後即說:「好彩冇輸畀佢啫!」他又表示無論誰奪獎數目較多,都一樣是坤哥請食飯,原因是要彌補之前放飛機太多:「約咗好幾次佢都唔得閒,以表誠意呢,到下一次食飯時佢請返我食,我覺得係天公地道嘅,我會專登揀一間貴餐廳,彰顯下佢身分吖嘛。」

至於頒獎禮,明擺「友情」上台,營造感動氣氛,Hubert亦直認算是一個表演環節,目的是希望重現7年前巨星舞台:「同坤哥比賽時同台有個環節,當時有個組合叫『清新靚聲』,仲有陳慧敏,雖然慧敏哥現在變咗JW,但在台上都諗返起《巨聲》嘅日子,幾感觸。」問到會否太消費「友誼」?Hubert就話:「唔緊要,我同坤哥之間友誼有好多,可以慢慢消費!」

坤哥今次頒獎禮後,終於不用一個人孤獨過。(Instagram圖片)

另外,勁歌完騷後,Hubert和Alfred就隨星聲的其他歌手去了公司慶功宴,而唱片公司為星娛樂的坤哥今次就不用再孤獨慶功,與同公司的鄭世豪一齊和同事慶祝,而幫忙訂枱的居然是「𡃁妹」李綺雯,𡃁妹更在Instagram甫合照寫到:「吳業坤話今晚幫佢book到枱食飯,會以身相許我拒絕左(咗),有冇人要?」有美女相伴,坤哥連合照個樣都迷迷地,可能有人陪,開心得滯飲醉咗?

Hubert就和Alfred、鄭俊弘、譚嘉儀、何雁詩等一同慶功。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。