敖嘉年棄無綫外闖搵錢 孖老婆開廣告公司：趁年青努力工作
《同盟》被譽為是《城寨英雄》的現代版，不但有陳展鵬、胡定欣兩位男女主角，還有鮑姐鮑起靜，更令人驚訝是多了一個久違的名字「敖嘉年」。他曾經是前無綫金牌監製李添勝的御用演員，但隨着去年添哥榮休，敖嘉年亦跟無綫結束18年的賓主關係，改簽部頭約，一年拍一齣劇集。馬國明不敢離巢發展，在頒獎禮坐足6年冷板櫈，反而敖嘉年放膽外闖，才發現世界很大，他一樣可以做男主角。
前兩輯《巾幗》也有敖嘉年，先是演敗家仔蔣必文，為他贏得「飛躍進步男藝員」，在續集演經常被欺負的「排骨仔」，亦獲提名男配角最後五強，有獎攞有劇拍，再下去…，原來沒有後續，或者說你會在電視上見到敖嘉年，如《來自喵喵星的妳》中「真小人」，《梟雄》的工會領袖，但卻難以叫出一個令人留下深刻印象的角色，而在拍攝《鐵馬戰車》前，敖嘉年毅然考了24噸貨車牌傍身，應該不會是為興趣吧！
敖嘉年14歲時父母離異，家庭環境驟變，令他明白適者生存的道理，在當上演員前，他做過製衣廠設計師、跟隨張叔平擔任助理美術指導，其後投考港台DJ訓練班，主持深宵節目《輕談淺唱不夜天》，直至98年加入無綫主持《城市追擊》，千辛萬苦捱到拍劇贏得「飛躍」，想不到差點打回原形，要轉行揸貨車。敖嘉年笑了兩聲，說是美麗的娛會，「我同TVB關係好好，一直都有工作，當時我去考電單車牌，咪順便考埋貨Van，後尾諗諗下不如直接考貨車啦。不過從未實戰過，反而拍《鐵馬戰車》時，自己親自落場揸電單車，唔使坐在拖架上拍。」
去年敖嘉年宣佈自己早已跟圈外女友結婚，亦作出了離巢外闖決定，他承認純靠TVB的收入，難以養妻活兒，他表示：「餓你唔死囉，但幫到你喺出邊搵外快，整體上cover到嘅。」敖嘉年的太太Betty，是前美聯社記者，在嘉年演藝事業低潮時，夫妻檔膽粗粗開了一間廣告公司，主要是做外國客戶，諗橋、搵演員、拍攝製作一腳踢，較為人熟悉的廣告有周大福及美素佳兒(上海)，嘉年笑指現時生意不過不失，由於公司上了軌道，他亦放心交給太太打理，自己專心返回內地掘金。
想不到敖嘉年剛跟無綫改簽部頭約，即接拍了在內地票房大收的電影《盜墓筆記》，打開了內地市場，「喺無綫咁多年，都想試吓其他嘢，之前都有考慮過去內地發展，咁啱又遇上呢個機會，每一個男人都應該趁年青時努力工作，唔可以乜都靠太太。」敖嘉年現時在一部內地投資的警匪片擔當男主角，飾演一名香港警察，該片更在泰國及香港取景。今年中則會接拍另一齣內地古裝電影，之後再有一齣古裝電視連續劇，再次擔當男一，坐了一回演藝人生過山車，讓敖嘉年對很多事也看開了。
對於伯樂李添勝的劇集，《巾幗梟雄之諜血長天》及《財神駕到》，淪為倉底劇，會否戥添哥不平？敖嘉年坦言：「其實無所謂嘅，至緊要有得出街，已經好開心啦，之前有啲同事，拍咗啲劇都未知幾時播出。」在行內打滾多年的敖嘉年，亦明白「親生仔」的遊戲規則，對於獎項不存厚望，「都做咗咁多年，唔會去強求㗎啦，其實拍劇為攞獎已經諗錯晒啦。」不去強求，機會卻滾滾而來，新劇《同盟》中飾演張國強兒子令智煽，在社團屬第二把交椅，將會成為鮑姐的眼中釘，繼《巾幗》的二世祖蔣必文後，又會是另一個令人津津樂道的角色，值得期待。