【3日2夜】J2女神黃文意有學識 中大文化研究畢業:身體唔係禁忌

撰文:
最後更新日期:

上回講到TVB旅遊節目《3日2夜》是美女發跡地,盛產大量大家平常都會走漏眼的美女。繼上星期播出新面孔鄺潔楹(Judy)仙氣登場,但好嘢總不覺得足夠,下一集又有靚女出場,就是24歲日系少女黃文意(Mandy)。節目預告短短30秒,見到Mandy身穿水著,完美身材盡現,隨即引來不少網民熱烈搜索,將Mandy起底,所以話想睇正嘢,可能要捕實《3日2夜》。

Mandy(左二)出身中大,學生時的她其實都幾有仙氣喎!

短短30秒的預告,就讓網民想睇下一集!

Mandy憑著節目彈底,當然要起佢底。原來她畢業於香港中文大學的文化研究系,是個高材生。節目出街之前,Mandy多數在娛樂新聞台出現,她也自言日常穿得比較密實:「今次係我第一次著比堅尼,平時好少出去沙灘玩。監製同我講拍呢個節目要浸溫泉,都要臨時臨急去搵泳衣。」結果Mandy泳衣look一鳴驚人,她坦言監製事前不知她擁有驚人身材,拍之前都有擔心節目的效果:「因為拍呢個節目嘅女仔好多身型都好firm,好似陳婉衡咁,佢又有馬甲線,都擔心會同佢哋格格不入,但好在都唔會有呢個問題。」

作為中大高材生,Mandy如今以水著成名,她又非常看得開,不擔心日後網民只留意她的身材:「希望先以身材吸引佢哋,之後再留意到我嘅內在同才藝方面,著得密實嘅時候,都有觀眾鍾意聽我講嘢,覺得好得意。」但Mandy始終都想日後在綜藝及拍多啲劇,如今以性感引人入勝,真的不介意被人定型,焦點只關注身材?她續道:「我本身讀文化研究,就有讀到關於Gender嘅嘢,覺得身體從來都唔係啲咩禁忌,又唔會覺得太尷尬,因為講起呢啲都好自然。」

黃文意小時候是個童星,曾經同過爾冬陞、吳鎮宇合照,拍過嘅戲男女主角都勁㗎。

除了出身中大,Mandy原來都做過童星,曾經同過方中信、袁詠儀拍過電影《我愛你》,做兩人囡囡;又試過拍鬼片《四月四日》,同場還有黃子華,的確幾勁。她講到童星生涯,講到身邊有幾個童星朋友,例如顏卓靈,如今事業發展都見順利,都替對方開心,但諗起自己就有考慮過是否要在演藝圈發展,「有諗過自己係唔係大咗少少,都知道自己決定遲咗。因為9歲的時候就去英國讀書,唔喺香港就自然冇人搵你,所以大個想讀master嘅時候,都諗起呢行青春係重要,都要遲下先做。而我加入TVB,得到機會都算快,所以都好開心。」

講到入TVB,隨時有機會要捱,但Mandy卻不介意:「就好似大學上莊咁,搏盡無悔。錢唔係最重要,最重要係追求個過程,的確係要辛苦捱更抵夜,但做到自己鍾意嘅嘢,係好開心。」她講到做娛樂主播會有底薪,所以不擔心收入問題,但最難忘就是拍完《乘勝追撃》後,接住要開工做主播。不過Mandy今次在《乘勝追撃》入面多了戲份,更與陳展鵬有對手戲,幾辛苦都值得。

問到現時的感情狀況,Mandy就向大家預告:「因為我單身,所以節目入面,工作人員就帶我到月老廟求姻緣。(咁靈唔靈先?)而家都有幾個值得了解嘅對象,但最緊要心地善良同成熟。自己仲後生,無諗到結婚咁長遠,兩個人一齊,開心就夠啦。」

平時在電視見到mandy,都好活潑㗎。

長髮的黃文意幾有學生味道。

黃文意其實係行日系少女路線㗎!



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。