李家聲隔16年再演雷震子造型不變 起火勁鬧TVB:好多人卸膊

撰文:
最後更新日期:

《八時入席》終於散席,緊接在8點檔播映的《財神駕到》,繼續是黎耀祥擔正,而首集劇情是財神亂用法力,繼而跟天庭上的滿天神佛鬧翻,其中一位神仙,正是李家聲飾演的雷震子,最神奇是該角造型時光倒流,跟16年前《封神榜》的雷震子,竟然一模一樣,巨型V字額、半禿頭配大尖嘴,再加背後一對鷹翼,再次飾演該角的李家聲,也忍不住嘆句「仲停留喺以前,唔進步咪退步囉。」

2001年《封神榜》(左)跟2017年《財神駕到》(右)雷震子造型竟然一樣。(網上截圖)

李家聲接受《香港01》記者訪問,對於十多年後再次飾演雷震子一角,他表示:「造型係一樣,不過嗰頭套面具唔係十幾年前嗰個啦,咁多年爛晒啦,如果仲喺度,俾我都唔敢戴。(是否為該劇新造的?)呢個都係舊嘅,應該係之前有類似角色用過,慳得就慳呀嘛。(有冇異味呢?)咁又冇,有人清潔過嘅。」家聲表示:「依家大陸都有播《封神榜》,再演呢個角色,都覺得開心、幾好玩囉,你都話十幾年前啦,小朋友睇住成長,係集體回憶。老實講戴住個面具,搵邊個做都得啦,咁都搵番我喎。」

李家聲表示公司劇集不進則退,質素每況愈下。(東星圖片)

在首齣劇集《季節》後,李家聲總共拍過逾60齣劇集,為人熟悉的有《封神榜》、《成吉思汗》、《仁心解碼II》,見證着無綫的劇集演變,但近年讓人留下深刻印象的作品,卻是買少見少,莫非無綫又一次不識貨,浪費演藝人才,他表示:「我實際50啦,呢啲樣嫩又唔得,扮Uncle又唔似,依家公司又多Cable、歌手呀,有角色俾到嚟咪做囉,我半退休㗎啦。」記者表示黎耀祥已經52歲,贏過視帝,一樣擔正做主角。家聲即說「佢位置好呀嘛,形象入晒屋,黎耀祥只得一個,李家聲可以有好多個。」

李家聲在《公公出宮》有份演出,但不是很多人知。(微博圖片)

對於近年的劇集質素,李家聲承認確實是每況愈下,一直停留在以前,他更以韓劇作比喻,「睇吓韓劇就知,第一代幾娘呀,依家唔同晒。(無綫現時的劇集被網民邊睇邊鬧?)乜鬧呀?直頭熄電視唔睇啦。」家聲94年的電影《屯門色魔》至今仍是港產經典驚慄片,而在2013年《仁心解碼II》,李家聲再次飾演變態色魔,姦殺女學生石天欣,由於二人演得入型入格,十分逼真,被網民封為強姦戲最佳拍檔,但之後卻無以為繼,家聲至今仍然氣難平,「可能覺得我過氣啩?我哋呢種演咗30幾年戲嘅演員,識得用嘅咪對套劇有幫助囉,不過唔係人人識用。好在撈咗咁多年都有「底樁」嘅,唔使煩供樓呢啲嘢,冇乜經濟壓力,有人俾咪做囉。」

李家聲在《仁心解碼II》,侵犯學生妹石天欣,由於演技逼真,二人被封為強姦戲最佳拍檔。(網上截圖)

李家聲在1994年的電影《屯門色魔》,成為驚慄片的經典之作。(網上圖片)

李家聲反問記者有否看上星期的《愛.回家》,笑說:「裡面講啲嘢真㗎,TVB裡面好多人急功近利、卸膊呀咁,拍得好真實呀。(個編劇影射公司,都好大膽?)好事嚟㗎,儆醒吓公司唔好咁商業。記得以前我哋拍《成吉思汗》,邊有分崗位?大家都係互相幫助。依家出去拍嘢,分咗4、5黨啦。」家聲近年少了曝光,正是不懂得搵山頭埋堆,甚至2017有什麼劇開,他也不知道,「唔會預早同我講定㗎,有角色啱先搵我,到咗我呢個階段,有時間咪去吓旅行,周圍睇吓個世界囉。」家聲再次強調「我半退休㗎啦」,不用求人,才真正活得逍遙。

49歲的李家聲,其實身材Fit到漏,仲有大把貨。(微博截圖)

李家聲曾拍攝無綫劇集《叛徒》,一個字「型」。(微博截圖)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。