大叔的愛.專訪︱Asha徐㴓喬18歲出櫃嚇親阿媽:佢以為自己做錯嘢

撰文:陳栢宇
出版:更新:

ViuTV劇集《大叔的愛》今個星期五(16/7)播出大結局,「阿田」Edan(呂爵安)情歸何處,屆時自有分曉,唯一肯定的是徐㴓喬(Asha Cuthbert)飾演的「梓芊」一早在這個「賽事」中被Foul出局。「一切都係Timing問題,如果梓芊肯再早一個鐘講,個結局就唔會係咁。」Asha好明顯是與「梓芊」是兩個人,「梓芊」遲遲未出擊搞到錯失最好時機,而Asha好明顯是想做就做的行動派:「我試過主動去追兩三個人,不過只係成功過一次。最認真一次,我真係豁出去,『你去邊,我就跟』,試過喺外國讀緊書,但冇同阿爸阿媽講,偷偷特登飛返嚟同人過生日,愛情嘅盲目,我曾經都試過,係一種機不可失嘅感覺,It’s now就now。」

Asha徐㴓喬日前接受《香港01》專訪,大談參演《大叔的愛》感受,以及力撐LGBT平權等話題。(葉志明攝)

Asha接受訪問時表情多到爆炸,點擊下圖觀看表情包:

+8

敢愛敢恨,是Asha的同義詞,她既是香港少數公開承認雙性戀的藝人,亦高調力撐LGBT平權。「大家講起LGBT,或者第一時間會諗起Asha,但係我希望有其他人出現,陸續有更多人大膽啲,而家有人低調地提到,我已經好開心。(好多藝人都未必敢講自己性取向,你有咩建議?)咁又唔使逼人出櫃嘅,但係我會覺得人咁都大,不如講啦,身邊有人支持,就唔使咁驚,不過覺得個反應係好大、負面,就再畀啲時間啦!」

《大叔的愛》是香港首套開宗名義的BL劇集,力撐LGBT的Asha,亦樂見本地電視踏出這一步:「相信陸續有嚟,搵我拍GL劇我OK㗎!」(葉志明攝)

點擊睇埋其他專訪靚相:

+8

談起Asha的跨性別男友Seth時,記者口快快稱呼他作「女朋友」,她聞言便即時糾正:「唔係講女朋友㗎,係男朋友呀,因為佢係Trans、變性嘅話,佢係裏面係男,就係男朋友,基本上係Delete咗之前嘅性別,不過亦有人好擁抱呢個轉變,好Proud of自己係Trans。(好多人都講錯?)其實我好多朋友都講錯,因為主流媒體好少提及呢樣嘢,呢條路真係幾漫長。」而她發現自己性取向,到向家人「出櫃」,亦花了不少時間:「我13歲意識到自己係雙性戀,到我18、19歲先同屋企人講,我阿媽好抗拒,因為佢係菲律賓人、天主教徒,佢唔係好明白發生咩事,佢有怪自己,『係咪我自己做錯啲乜嘢』,所以都要啲時間證明畀我阿媽睇,呢件事係好自然,而我阿爸就Open啲。」

Asha與Seth愛得高調,不時在IG放閃。(Instagram/@ashaetc)

點擊下圖觀看Asha精選IG靚相:

+16

現時香港的婚姻制度仍然是「一男一女自願終身結合」,所以Asha都考慮過之後到其他地方註冊:「但係未知幾時,而家拍咗拖三年幾,不過最重要都係等埋阿爸阿媽嚟見證,疫情關係,我都有成兩年冇見過佢哋。(你理想嘅家庭係點?)都想有小朋友,都有傾過係想收養嘅,唔係自己生都冇所謂,可能係因為自己係獨生女,所以我一個就夠㗎喇!(Seth都一個就夠晒數?)佢想美式大家庭,三、四個小朋友嗰隻,我話『你Handle到先算啦,賺到錢、有地方都OK嘅』,但我會寧願養多啲貓貓狗狗。」

Asha與父母關係甚好,但因為疫情關係,被迫分隔香港、菲律賓兩地。(Instagram/@ashaetc)

講起賺錢、買到樓,相信大家都記得Asha曾拍YouTube片怒轟無綫(TVB)節目《網絡挑機》、狠批王晶「成功等於有錢買樓」的言論,6年過去,想法有否改變?Asha直指自己想法始終如一:「我自己對成功嘅定義,6年前後都係一樣,我開心就得,我的確仲係租緊地方,但覺得自己好成功,起碼比起兩年前,我係成功咗好多。(你有進步,TVB有冇進步?)其實我冇乜點睇TVB,而家都係睇Netflix同埋ViuTV多。(唔睇TVB,咁拍TVB劇又得唔得?)嗰邊咁多Limit,咁多標籤,我唔鍾意有標籤喺自己身上,呢度係我最舒服嘅地方。不過,Money is money,我又唔會咁快Say no嘅,如果佢係Open to something,例如LGBT嘅話,同埋都唔知嗰邊會唔會要我啦,真係有機會先算。」

社會不斷進步,難保大台也會變得擁抱多元文化,若果有一天Asha在TVB劇集出現,絕對是一件好事。

Asha是香港「元祖級YouTuber」,但她已經有接近半年時間冇拍新片,原因是什麼?「我唔想求其拍個Topic,唔想無啦啦、未諗清楚就拍一條片,我想有番少少Quality嘅內容,而家冇咩爆發性嘅嘢想Share,要我即拍即剪即放上網。」(YouTube/@ASHA ETC)