被指秘戀何依婷4個月拍拖夾公仔 羅天宇呼冤：佢哋攞嚟造新聞
撰文：吳子生
出版：更新：
被封為「女神收割機」的羅天宇，早前被傳拍攝無綫新劇2021版《十月初五的月光》時暗撻同劇女主角何依婷，雙雙秘戀4個月，更被指在該劇煞科宴上偷偷拖手仔，又孖住拍拖夾公仔，相當甜蜜。
今日（9/9）羅天宇出席無綫新劇《把關者們》宣傳勢造活動，就此事接受《香港01》訪問時含冤受屈說：「其實我真係好無奈，但又真係冇辦法。其實夾公仔嗰啲相係喺我哋拍攝嘅場地影，而嗰條片係我post IG story嘅，而呢啲相同片係我拍劇時無聊攞嚟影吓，但佢哋就攞嚟造新聞，我自己睇到都真係冇乜嘢可以講。坦白講係有少少影響咗工作，亦有少少影響心情，因為連認識我身邊嘅人都走嚟問我係咪真。我想再次澄清嗰啲只係一啲工作照嚟。不過始終紙同筆都喺人哋度，唯有做好自己。」
被指同何依婷秘戀四個月，羅天宇大感無奈。（陳順禎攝）
被問到會否同其他女演員避忌保持距離？羅天宇苦笑：「其實我已經保持距離，但大圍記者要求我坐喺佢身邊一齊合照。同埋我哋拍嘢嘅時候都冇乜去顧忌咁多，亦明白工作時好難去小心，唔通要食飯嘅時候，我唔同你食，要影合照嘅時候又唔影，咁所以係好難去避免。（何依婷是否你杯茶？）唔會啦！佢成日同我傾啲愛情嘢，講愛情觀，我哋係好朋友嚟。不過佢係一個好女仔嚟。」
羅天宇大讚何依婷是個好女仔。（陳順禎攝）