【年初一】龔嘉欣迎年派利市加碼：最想好運承接到

大年初一，祝大家新年快樂！新正頭，汪明荃戴上一身金飾，率領一眾藝人龔嘉欣、劉佩玥、馮盈盈、麥玲玲等與無綫高層向觀眾拜年。

劉佩玥與龔嘉欣去年可算是鴻運當頭，雞年一到，雖然她們在工作中度過，但新年可以見一班同事都冇咩所謂，最想好運承接下去。龔嘉欣更表示今年的開工利市都加碼：「今年第四年派利市，但舊年攞咗獎，都好開心，所以利市都加碼。」劉佩玥則表示預備了五位數字開工利市。

龔嘉欣與劉佩玥到現在都未有著落，新年一到，會否被親戚催促搵返個男友？嘉欣表示：「阿爸阿媽以前會想我快啲搵返個，但近年都叫我唔好咁快，要慢慢認識一個適合自己，始終一嚟想搵個結婚對象。（點解之前男友唔適合？）呢啲經歷，會令我自己知道想要咩。」至於劉佩玥就話：「我屋企從來都冇提起，自己都唔心急。（佢哋唔會都催下你？）真係冇，始終要結婚都係個人嘅事，但有男友都會同佢哋講嘅。」