專訪︱小肥新歌《廢柴》望同路人戰勝心魔 坦言對愛情冇希望

撰文:陳芷穎
出版:更新:

小肥(徐智勇)去年於陳志雲主持的節目《Stephen.傾》宣布出櫃,公開承認同志身份,更造就了與陳輝陽和林夕合作的契機,推出度身訂做的新歌《廢柴》。出道14年,小肥坦言不時就會浮現放棄念頭,最迷惘的一次更想退出樂壇,幸得好友姜文杰當頭棒喝,一句「你已經好幸福」令他繼續堅持音樂路。《寵物》和《時光機》是小肥的代表作,但多年來紅歌不紅人的他自覺已經賺了。談到出櫃後的改變,小肥坦言演藝路比以前更易行,因為已經「唔使再遮遮掩掩,可以大大聲講出自己感受。」
撰文:陳芷穎
攝影:梁碧玲

小肥去年於陳志雲主持的節目《Stephen.傾》宣布出櫃,公開承認同志身份,更造就了與陳輝陽和林夕合作的契機,推出度身訂做的新歌《廢柴》。(梁碧玲攝)

《廢柴》講述心魔 小肥曾遇樽頸位想退出樂壇

《廢柴》這首歌是陳輝陽為了賀小肥宣布出櫃而作,不過林夕的歌詞卻不是特別關於出櫃,小肥解釋歌詞着重的是人的心魔:「夕爺用咗另一角度寫,點解要躊躇喺出櫃呢件事。處事最大問題係有心魔,人哋眼光都係自己設計。『廢柴』呢個稱號都係自己畀自己,收到好多留言話有共鳴,人有好多無喇喇睇死自己嘅時刻,透過呢首歌了解自己多咗,可能會挽救到自己。」

2007年出道的小肥至今已經入行十四年,他直言腦中不時浮現放棄念頭,最迷惘的一次是出道第二年、準備推出第二張唱片時發生。(梁碧玲攝)

2007年出道的小肥至今已經入行十四年,他直言腦海中不時浮現放棄念頭,最迷惘的一次是出道第二年、準備推出第二張唱片時發生:「2008至2009年好迷惘,唔係好知自己想點。第一隻碟有大家都識嘅《寵物》、《時光機》,對07新人嘅我,成績唔差。一到第二隻碟就壓力大,咩都攬上身但又搞唔掂,質疑自己,以為自己好勁但咩都搞唔掂就有呢個低潮。」

他坦言當時更萌生退出娛樂圈的念頭,幸得好友姜文杰當頭棒喝,令他繼續堅持做音樂:「MSN可以打Status,我打咗『好想退出』,顯示咗十分鐘,姜文杰睇到就鬧爆我,佢話『你已經好幸福,有公司,出歌又唔使錢,只不過遇到瓶頸位出唔到,我同阿妹出歌要自己畀錢,好辛苦,你咁幸福唔好同我講放棄』,我話講下啫。」小肥說每次低潮都是靠朋友走過,更笑言:「朋友第一、親人第二,好不孝。」

他坦言當時更萌生退出娛樂圈的念頭,幸得好友姜文杰當頭棒喝,令他繼續堅持做音樂。(梁碧玲攝)

多年來紅歌不紅人 小肥竟自覺賺了

小肥的唱功不差,多年來亦有一直推出新歌,但外界記得的就好像只有他的出道作《寵物》和《時光機》。多年來紅歌不紅人,小肥竟自覺賺了:「起碼紅到歌都幾好,見到呢啲留言覺得有賺,最驚渣都冇。除咗唱歌,冇咩想俾人注視到,紅歌唔紅人都賺,最驚連歌都彈就灰心啲。」不過他卻否認外間所講「再冇代表作」的說法:「係時機,我都得到幾多幾好嘅歌。《寵物》同《時光機》永遠都係首位,《父親》、《一首歌》都多人提及,亦為我拎到之前冇嘅獎。都係時機,同埋唔及《寵物》隻碟咁中。」

小肥給人的感覺是唱歌不差兼有實力,不過卻好像欠缺一點野心,連「金牌經理人」黃柏高(Paco)亦曾指出這個問題:「我淨係想唱歌,Paco成日都話我冇野心,做歌手冇野心唔得。近期明白野心都緊要,出咗櫃之後覺得唔好再欺騙自己,知足得嚟都要踩下油,唔好成日話低調、平常心。做得呢行唔可以咁,淨係鍾意唱歌不如去酒廊唱算,點都要追求上進心,但唔係踩低人抬高自己。」問到小肥音樂路上的目標,他希望可以獲得更多人的認同以及在更大的舞台唱歌:「想多啲人認同到攞獎大家都覺得係你,或者舞台再大啲,去多啲唔同地方唱。去啲完全冇人識嘅地方唱歌,如果喺你都唔識我嘅地方唱歌,唱到你畀掌聲我,滿足感仲大。」

小肥坦言宣布出櫃後,演藝路行得比以前容易,當沒有事情需要隱瞞時,人際關係亦不知不覺有所改善。(梁碧玲攝)

出櫃後演藝路變得更易行 直言對愛情沒有希望

小肥坦言宣布出櫃後,演藝路行得比以前容易,當沒有事情需要隱瞞時,人際關係亦不知不覺有所改善:「唔使再遮遮掩掩,可以大大聲講出自己感受。人際關係唔同咗,平時好驚接觸嘅傳媒朋友,我會解開心扉,真正認識就多咗溝通,多咗溝通就會多咗訪問。以前唔想俾人覺得我搲撈,而家唔會咁諗,好傾就傾,關係不知不覺就好咗。」他續指有不少人說近年才真正認識自己,面對傳媒朋友時亦變得較從前從容:「做訪問冇嘢要擔心,冇嘢唔可以答。」

目前單身的小肥直言對愛情沒有希望,暫時亦無意拍拖,曾經歷愛情路上的失敗,他坦言「怕咗喇」:「唔想再有,對上一個係海外,有少少不歡而散,除咗疫情同距離,要重新投入一段感情要好多心機同時間。對上十年嗰個都花咗兩、三年了解,生活同性格上先磨合到,最後都分開,分開都和平,變咗家人咁。一諗到搵唔返咁了解你嘅人會覺得煩,唔明你份工啲時間,要用好多時間去解釋,諗起就驚,尤其海外嗰個令我怕咗。」

點撃睇更多專訪照片:

+9

場地:manta.house

化妝:Yen Lai

髮型:Bowie Lo@Admix Hair Styling

Styling: Patrick Ho