范振鋒（阿范）今日（23/10）邀請好友胡諾言（胡仔）到新城電台做嘉賓，接受電台節目訪問。阿范透露認識胡仔十多年，笑說胡仔未婚前，經常帶同陳琪出席聚會打麻雀：「有次陳琪落場同我哋打，而胡仔就企喺佢旁邊不斷指手劃腳，叫佢打咩牌，搞到陳琪最終頂唔順佢，要起身同佢講話唔打，叫佢自己打返。其實胡仔本身都唔係好識打，但我哋見到佢大師上身咁，我哋都忍唔住笑。不過我知都好多人都鍾意搵佢打牌，相信係好腳嚟，應該係水魚嚟。」