【Biohazard 7】女機神張曦雯15歲穿脷環 自稱千杯不醉未斷過片
張曦雯成為TVB史上第一個女藝人，在著名平台Twitch直播打機，玩喪屍Game《Biohazard 7》。直播時，由於隻Game太恐佈太緊張，就算張曦雯玩過，都依然好驚，仲忍不住爆粗大叫：「FXXK！」，表示：「打機好難唔講粗口。」由於張曦雯直播表現夠爽直夠真，網民都已經勁Buy，大讚她「講粗口都好聽過人」，更加重要的是，張曦雯不是一般港女趁墟打機，而係真﹒識打，槍法準繩，絕無半點喪撳搏打中，直接獲得大量網民力撐，「女仔識打機真係好吸引！」
張曦雯直播打機之前，大家對她的印象，大多來自她主持高級生活節目《港生活﹒港享受》，會認為她很有生活品味，不論食飯、買衫有好高要求。但張曦雯在美國生活10年，養成了鬼妹仔性格，為人爽朗之餘還帶幾分野性㖭。好似早前她接受傳媒《E+娛樂》訪問時，講到自己與朋友食飯，去邊都無所謂：「好多人以為我去食飯，都會去you know four season or something，but唔係我（風格嚟㗎嘛）」。食飯時，見到檯下有墊腳位，張曦雯更會一邊食一邊放雙腳上去，朋友見到都覺得驚奇，笑言：「嘩，估唔到你係咁，我等咗你好耐，我又放埋隻腳上去。」張曦雯十分隨和，覺得這個行為舒服、自在，所以從來都冇介意過。
張曦雯性格隨和，已經嬴晒，夠晒girlfriendable。原來她還有豪爽的一面，就是她大爆自己好飲得，更是遺傳自母親。她表示自己平時已比朋友飲得多，「好似冇乜事，跟住佢哋個個都醉晒。」張曦雯更表示自己不會瞓低、斷片，聽落覺得張曦雯係女中豪傑。
豪邁又邊止一樣？張曦雯講到過往在美國生活，喜歡聽Rock Music，喜歡的程度是可以瞓街排隊買門票睇band show。年輕時喜歡Rock Band的人，都總會有點叛逆基因，打扮會比較前衛。張曦雯大抵因為如此，15歲時走去穿脷環。回想過往的穿環經驗，她笑言是一個「很bad的idea，因為講嘢會黐脷筋。」後來Kelly的媽媽發現，立即下令她要除環，不過Kelly還是很得意地話自己都keep到3個月，睇到張曦雯的反應，都覺得佢真是好率性。
還記得張曦雯講過未來動向，她有意做youtuber，教大家煮嘢食。如今開live打機反應如此熱烈，令網民期待她下次再開台。同時都相信，張曦雯往後真的開台教煮菜的話，應該會很受歡迎，同時讓男士大嘆：「呢種女仔可以喺邊搵到！」理想對象的條件也因為張曦雯，又要提高啦。