戴夢夢與圈外男友結婚 邀舊愛Ricky出席遭拒絕：佢話費事錯焦點
撰文：吳子生
出版：更新：
戴夢夢今日同圈外男友Kyle正式拉埋天窗。（梁碧玲攝）
36歲戴夢夢早前爆出與太極鼓手Ricky拍拖震驚娛樂圈，其後分手復合再分手。上月（18日）戴夢夢突然在社交平台爆婚訊，宣布閃嫁金融才俊Kyle，並開心分享兩輯跟未婚夫戶外唯美婚照，大晒幸福﹗
今日（8/11）戴夢夢與圈外男友正式拉埋天窗，晚上於灣仔君悅酒店舉行婚宴，並延開8圍，廣邀圈中好友一同分享喜悅。下午五時15分，一對新人現身會見傳媒。影完合照，老公Kyle未有陪同老婆戴夢夢接受現場記者訪問，戴夢夢笑言：「其實佢落嚟之前佢已經緊張，但我仲呃佢得幾個人，但落到嚟見到咁多人佢仲緊張。」
戴夢夢大讚老公Kyle煮藝了得。(梁碧玲攝）
被問到有否邀請舊男友Ricky出席婚宴？戴夢夢表示：「其實私底下係有問過佢。不過佢就拒絕咗，因為佢覺得到時費事錯焦點，始終都有雙方家長同老人家喺度。咁所以佢前兩日仲特登攞咗份禮金畀我，仲送上祝福，希望我幸福快樂，生活開開心心。」
結婚戒指好搶眼。（梁碧玲攝）