萬千星輝2021|《演鬥聽》入綜藝五強 王梓軒感謝曾志偉知遇之恩

撰文:張嘉敏
出版:更新:

無綫音樂節目《演鬥聽》成功入圍《萬千星輝頒獎典禮2021》綜藝五強,該節目音樂總監兼主持王梓軒對於能夠入圍五強當然感到十分之開心。他回應《香港01》時表示:「當初係志偉哥 (曾志偉) call我話好想開一個音樂節目,只要係可以幫到啲新血,畀到啲新舊人一齊可以同台玩得開心,好似一個大party咁樣,佢就任我度。咁我嗰時其實係覺得好不可思議既,甚至乎覺得有少少不可能咁樣。因為我之前都有分享過啲音樂節目可以點樣做,不過當時既公司就未必係咁接受,今次呢個情況呢一種畀我既自由度,我突然之間覺得自己好似有啲責任我一定要做好。」

王梓軒是《演鬥廳》音樂總監兼主持。

於是他就與他的經理人開始一齊度橋call人,又按嘉賓的長處和興趣去度身訂造。他又多謝台前幕後所有工作人員,製作過程和拍攝過程都好開心,團隊一起投入參與是真正的玩音樂。他又強調當然要多謝志偉哥給予他們這個機會,做新節目實在不容易,而志偉一直有跟他們保持聯絡,給予鼓勵。

《演鬥聽王者之戰》拍攝完畢後,梓軒與一眾演鬥band成員開香檳慶祝。
王梓軒好多謝曾志偉。(葉志明攝)