演鬥聽|王梓軒預告即將開拍第二季:我哋樂壇有少少似改朝換代

撰文:賴家杰
出版:更新:

TVB音樂節目《演鬥聽》入圍了《萬千星輝頒獎典禮2021》的「最佳節目」五強,對於久違了的新音樂節目,有這一個好成績,節目中的主持及靈魂人物王梓軒相當開心,因此今天(12日)舉行了一個祝捷午宴,同時梓軒邀請了節目的樂隊一起食飯,包括朱敏希(KW)、Joey Lam、張可永(Byron)、包仲欣(Lydia Pau)、鄭嘉嘉(Wendyz)和黃浩邦(Dr.X)。

每一個有份拍攝這節目的音樂人,在開始這個音樂節目的時候都有一個好奇,這節目是做什麼,KW說:「因為王梓軒叫我先嚟做,開始時都唔知道自己做緊咩,之後慢慢先成形,再開始Enjoy。」

KW講希望有第二季。(賴家杰攝)

鼓手Joey Lam負責打鼓這部份,他亦認同KW所說的事,就是起初不知道自己在做什麼:「拍嘅時候都未知,到最後睇返第一集,呢個節目發掘到好多歌手唔同一面嘅音樂節目。」

Joey Lam認為這個節目比起其他音樂節目更出色。(賴家杰攝)

從加拿大回來的張可永(Byron)表示在這節目認識到一班兄弟姊妹,這是令他一生難忘的事,「我覺得多咗好多個好朋友,跟住呢個節目完咗得著咗好多音樂上嘅新技能,因為即興作新歌,要好快完成。」

Byron用半年時間學好廣東話仲要識寫,好叻。(賴家杰攝)

負責拉二胡的包仲欣(Lydia)坦言是梓軒主動聯絡她:「聽個陣好緊張,我感覺係好玩節目,同鍾意嘅音樂節目。起初要面對鏡頭我都覺得好大壓力都係一種挑戰,之後都估唔到會變成為好朋友。」而琴方面是鄭嘉嘉負責,她是眾人心中的隊長,她笑言是非常大壓力:「我開頭坐喺到都唔知發生咩事,之後梓軒搵我做隊長我都唔知咩事。可能我比較惡,因為之前教書教小朋友。」

Lydia負責二胡。(賴家杰攝)
鄭嘉嘉係隊長。(賴家杰攝)

另一個隊員是Dj dR.X黃浩邦,dR.X爆拍呢個節目真的是不眠不休:「真係半年唔使瞓,不過拍拍下發現人才好多,同埋訓練埋自己記憶力,依家拎埋TOP5,好快拎埋TOP1都未知。」

dR.X終於打鼓。(賴家杰攝)

最後由節目靈魂人物王梓軒發言:「大家好我係神算軒,因為香港音樂節目玩咗好多款,我哋樂壇有少少似改朝換代,開頭真係有諗點創新,同埋搵佢哋我都唔敢同佢哋講實拍咩。第一季完咗公司已經搵我哋拍第二季,但我哋想再度下新Game去試下,同埋搵緊歌手傾緊。」

希望可以拎「最佳節目」。(賴家杰攝)
已經慶祝定。(賴家杰攝)