阿仙奴被拜仁大炒未離棄 20年死忠方力申:覺得唔夠霸氣 !

撰文:
最後更新日期:

方力申支持了阿仙奴接近20年,見到愛隊被大炒,當然唔開心啦。(林迅景攝)

歐聯賽事重開,球迷們又要捱夜睇波,見到支持的球會嬴波當然開心兼好精神,但如果是阿仙奴球迷,昨晚就真係輸到訓唔着!事關在16強首回合,他們作客輸給拜仁慕尼黑1:5,基本上同出局沒分別,事後Arsenal TV訪問了一位有到現場睇波的外國阿記忠粉,該位球迷粗口橫飛批評球隊,仲叫領隊雲加快點辭職(當然是以最粗俗的方式表達)。該片段在香港網民配上廣東話字幕後被瘋傳,不少阿記球迷均覺得被他說出心底話。

Arsenal TV訪問了一位阿記忠粉,他在現場見証球會被大炒,事後接受訪問相當不滿,片段還在香港網絡瘋傳。(網上截圖)

演藝界方面,就連支持了阿記近20年的方力申都看過此片,今日他出席活動時亦透露了自己輸波感受,簡直灰到一個點,他說:「我當晚有起身睇,嗰位球迷條片都好多人畀我,唉…….咁當你輸輸吓,就會輸到習慣咗,對佢(阿仙奴)冇太大期望,自己覺得阿仙奴唔夠霸氣,唔夠鬥志,往往喺對佢有期望嘅時候,就唔發揮,對佢冇期望嘅時候先至嚟發揮,冇大賽爭氣嘅表現。冇辦法,你鍾意一隊波已經變成一種習慣,我無論點都會繼續支持。」

 

方力申真係阿記忠粉,不過相當理性,會同球隊共患難,絕對不是勝利球迷,圖為他跟阿仙奴名宿龍格堡合照。(網上圖片)

大家完全感到小方係輸到有點麻木,不過小方對阿記都有不少意見,但仍支持領隊雲加續任,他說:「我自己做咗咁多年球迷,就算對佢(雲加)唔滿意都好,都唔可以抹殺佢為球隊嘅付出,永遠就係咁,如果係一隊Winning team當然大家就好太平,但你見今年嘅李斯特城都知啦……(雲加駛唔駛炒?)我真係唔知喎,有球迷話應該升佢職,升到佢最高級位置,再請另一位領隊,可能會唔同,但變化係咪一定好呢?我就唔係要一定換領隊嘅球迷囉。(奧斯爾、山齊士都經常話走喎?)畀錢咪唔走囉,呢啲嘢要改,我覺得阿仙奴其實又賺緊錢,咁嗰時勢都係要畀錢先留到運動員,你又唔係爭到標就梗係為錢㗎啦,留住人才梗係要畀錢啦,阿記不嬲都孤寒㗎,成日話唔買人,跟住又話邊個復出就係最好嘅收購,但買人係一種士氣嘅提升,等球迷覺得球隊係進取囉。(阿記幾時再攞冠軍?)我覺得一直都有機會,呢兩三年應該有機會,(年年第四有咩感覺?)……都唔係嘅,上年都好似第三啦,冇㗎喇,忠實球迷就係忠實球迷囉。」方力申真是高質忠粉,就算球隊幾水深火熱,依然不理不棄,亦不會大吵大鬧,做球迷真是要向他學習這種心胸。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。