Lucy李元元演繹首飾系列勁貪靚 《造星》Yoyo、超酸搶鏡過佢?

撰文:陳栢宇
出版:更新:

李璨琛(Sam)女兒李元元(Lucy)一向深受網友歡迎,最近更成為新一代廣告人氣王,接Job接到手軟,她日前便與媽媽梁志瑩(Sophia)演繹首飾系列,拍攝期間更大放笑彈!當Sophia幫女兒戴上首飾時,Lucy即手舞足蹈興奮不已,急不及待向鏡頭擺出嘟嘴、單眼、扮兔仔等超萌甫士,Sophia笑謂:「阿女好鍾意扮靚,成日玩化妝玩具、搽指甲油等,啱啱見到咁色彩繽紛嘅獨角獸頸鍊,對眼即刻發晒光,全程戴住仲唔捨得除!」

而ViuTV選秀真人騷《全民造星IV》廿強葛綽瑤(Yoyo)和陳昭煊(超酸)亦有份獲品牌睇中齊齊影硬照,同屬Team A的兩人感情深厚,拍攝當日合拍地擺出優雅的舞姿及「心心」Pose,其中正與姜濤及Ian(陳卓賢)合作拍攝新劇《季前賽》的Yoyo說:「我平時都有買開手鍊,特別鍾意簡單小清新嘅款式,今次仲可以同超酸合作好開心,拍攝成日都笑唔停!」一向穿搭行型格路線的超酸打趣道:「呢個系列有串飾象徵Roll Together,好啱做閨密頸鍊,我哋一人一條就最好!」二人又盼稍後有更多合作機會。

至於拍拖6年的前毛記電視「偽人」Cherry及Kyle每日均形影不離,二人戴上「觸動愛」系列Sweet爆合照,並向大家分享愛情保鮮法,指一起久了也要記得拍拖放鬆一下,跟伴侶一起做無聊的事。

Cherry(左)及Kyle每次相處都能夠觸動愛。