【親親我好媽】江嘉敏被雪 江美儀替「乖女」不值:等件事丟淡

撰文:
最後更新日期:

黃智賢與江美儀都希望江嘉敏可以盡快解決被雪之事。(符祥定攝)

無綫劇《親親我好媽》反應理想,今日一眾演員江美儀、黃智賢、陳敏之等人到小西灣一間中學出席宣傳活動,與一眾學生大玩遊戲。對於收視成績不俗,兩位主角黃智賢與江美儀都鬆一口氣,江美儀表示:「我晚晚都會同阿Ben用Whatsapp傾計,有次仲傾到喊,因為拍呢套劇都有好大壓力,始終杜生(杜之克)都安排我哋拍呢套戲,對我哋都有期望。」黃智賢與江美儀不求添食,只求下次再有機會合作。

江美儀私下與江嘉敏食過飯,並開解過對方。(符祥定攝)

另一邊廂,飾演兩人女兒的江嘉敏多次缺席宣傳活動,被指因接拍ViuTV劇集《三一如三》而被TVB雪藏。對此,江美儀都希望江嘉敏盡快解決事情:「世事好多嘢都唔係我哋可以控制到,既然發生咗啲事,盡快解決咗佢啦。」江美儀又透露對方一直有聯絡,並且開導她:「我有同阿女出嚟食飯,咁啱得咁橋我第二個女又係新西蘭返嚟,幾個女一齊出嚟食飯,佢都有同我講呢件事,咁我就同佢講,你等套戲出咗街先,等件事丟淡啲啦,咁觀眾反應好嘅,你咪上去藝員部,睇下可以點樣解決到件事囉,咁簽咗咁多年,唔會咁多年都雪嘅我覺得,我覺得都係爭少少磨合嘢㗎啫。」黃智賢都表示認同,「乜嘢都可以解決到嘅。」江美儀再續道:「乜嘢都可以解決到嘅。」

有報導指江嘉敏被雪藏的另一原因,是太有主見,TVB有意安排她入訓練班,再指導一下。江美儀就不同意:「唔係喎,佢好乖喎。」黃智賢就覺得:「佢係聰明嘅,亦都好fresh啦,如果唔係都唔會咁廣泛地受歡迎啦,我都覺得係冇嘢係解決唔到嘅,可造之材公司都會睇到。我覺得演員有啲嘢要經歷嘅,經歷過之後就會成長嘅。」江美儀再補充:「公司都會知道,都算啦你都做得幾好,可能會原諒佢呢,經一事長一智下次咪唔好錯囉。」兩人都認為江嘉敏仲係細路女,公司都應該要畀機會佢,最希望對方大結局時可以一齊食餐飯。

黃智賢與學生打成一片。(符祥定攝)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。