【開心速遞】新人紅衫魚最搶戲 蘇韻姿:希望快啲養掂自己

撰文:
最後更新日期:

應屆港姐第四名的蘇韻姿在《開心速遞》飾演有社交障礙的紅衫魚,但現實中的她相當健談。(網上圖片)

繼《八時入席》後,新處境劇《開心速遞》昨晚首播,搶鏡的不是丹爺、單立文,而是新人應屆港姐第四名的蘇韻姿Andrea,劇中飾演丹爺細女紅衫魚,在第一集戲份超多,第一次孭重飛拍劇表現相當不俗,非常自然。其他有名銜的港姐馮盈盈、劉穎鏇等,還做緊親善活動,蘇韻姿已日日為《開心速遞》開工,快人一步,大家一定覺得她不是這麼簡單,但蘇韻姿稱不知道原因,她說:「講真,我知我好好運,但我真係唔知恩人係邊個?我想多謝佢都冇辦法,想寫張聖誕卡多謝佢都唔得。拍《老表》或者呢套《開心速遞》都係突然間有人打畀我,其實落選嗰陣都諗緊下一步點行,已經搵定其他工,我由多倫多返嚟之前,都同媽咪講咗可唔可以畀我三年時間,我預咗呢三年時間可能做路人甲,一句對白都冇,三年後可能有句嘢講咁啦,依家真係覺得自己好好彩,不過要屋企人支持住,我真係唔好意思,希望快啲養掂自己,之後報答返佢哋。」

《開心速遞》第一集故事圍繞住細女紅衫魚(蘇韻姿飾),作為新人真是一個不錯的起步。(網上圖片)

蘇韻姿很想當演員,16歲已有人想簽她當歌手,但當時她的母親要求她完成大學先,她說:「我好想以演員為我的終身職業,所以媽咪要我完成大學,我話好,但我揀讀戲劇,我真係唔係玩玩下。我想做演員,以前遇到一位前輩,佢叫我返嚟TVB試下,試下選美,其實我都知自己機會唔大,我太男仔頭喇,點會選到?我攞到第四都已經好開心,我知套劇出街,一定會有人鬧,或者俾人話我做得唔好,但希望大家俾啲時間我,好多謝湯盈盈教我用iphone學廣東話,仲有丹爺、豹哥、阿蟹,冇佢哋真係唔知點應付咁多中文。」

蘇韻姿港姐比賽表現不俗,最終獲第四名。(網上圖片)

蘇韻姿今年23歲,在劇中飾演碩士生,網民應該不會覺得離地吧?(網上圖片)

蘇韻姿選完港姐後,即拍《老表,畢業喇!》,之後再拍《開心速遞》。(網上圖片)

蘇韻姿在選美期間,一直表現不俗,更是5強熱門之一。(資料圖片)

23歲蘇韻姿原先估計要做三年路人甲,但喺《開心速遞》戲份重,相信前途是光明的。(網上圖片)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。