【有樓萬事足】極慳男守得雲開現月洗5萬 奉勸大家慳錢要及時
撰文：郭敏玲
出版：更新：
岑生終於守得雲開，不過依家好難慳錢。
自從《有樓萬事足》「極慳男」案例出街之後，網民都非常詫異：「50蚊一日係點做到？」、「依家食一個餐都唔止50蚊喎！」、「慳到咁真係值得嗎？」。不過，同時都有人對岑先生大為欣賞，亦好奇上到車的他，有埋老婆仔女，仲可唔可以一日使50蚊？
圖中就是岑先生現時住的西半山單位。
岑先生對此表示：「依家當然唔得啦，我一日只用50蚊嘅時候，係講到十幾年前，差唔多SARS嘅時候。都知道依家年輕人想儲錢買樓，一日畀自己用50蚊係難嘅，都可以酌量用多一百蚊一日囉。」咁岑先生講出自己極慳的心路歷程，又係為乜？他說：「其實都係想話畀大家聽，儲錢要趁早開始。加上有好多年輕人呻自己買唔到樓，係正常嘅，邊有人一讀完書就買到？所以我都想同佢哋講，慳錢係可以買到樓，不過係長時間同埋辛苦自己。」岑先生強調儲錢係100％靠自己，對於節目另外一個受訪者Macy每月儲到105％，但原來係用盡家人、男友資源，就不太同意這個做法：「如果你有『父幹』，而你爸爸為你買完樓後，唔會乜都冇咁都可以接受，但要人為你付出連棺材本都用埋，我唔支持囉，一定要靠自己。」
岑先生現時上了車住在西半山，再也不能像以前慳錢時代，使費直頭幾何級數上升，他在電話表示：「屋愈住愈大，錢愈使愈多。」即是岑先生有換過更大單位？他後來在WhatsApp表示一直住在西半山，沒有換過樓的意思，他再解釋：「依家要供樓，每月都要用成3萬元。再加上家庭種種開支，又要2萬幾。所以依家唔再好似當年一樣慳咁多錢了！整個家庭開支，要由我一個人負擔。除以1個月30日的話，每日要近2千元！結論係，如果大家唔趁後生節儉一啲，人愈大，身邊愈多人要你去照顧。到時，你父母退休冇收入根本冇辦法進行慳錢計劃。」