關寶慧張慧儀難忘演女同志 尷尬濕吻:個導演都有少少嬲

撰文:洪曉璇
出版:更新:

由張慧儀、廖子妤主持的香港開電視節目《曬ya馬拉moi》,本集邀請了關寶慧擔任嘉賓,並親自下廚為對方炮製馬拉菜,期間二人除了大談「那些年」的飲酒瘀事外,關寶慧更自爆一個小秘密,透露自己一直為張慧儀物色男友,希望對方能結良緣。

張慧儀邀請了圈中閨密關寶慧擔任嘉賓。

張慧儀透露「那些年」跟關寶慧收工一起食飯飲酒的日子,期間二人分享了一件飲酒的瘀事,張慧儀表示:「有次飲完酒要走,你知我啦,成日都會招惹狂風浪蝶,嗰次有個好英俊嘅外籍人士同我搭訕,冷落咗你(關寶慧)咁。」身旁關寶慧聞言即說:「係啦,都冇人同我搭訕,咁啱我見到有個朋友行過,於是我大叫個朋友『衰人』,嗰個人望住我4、5秒,跟住我仲問佢係咪住呢度,講完一輪,原來係我認錯人,我以為佢係羅君左!」

兩人談及當年醉後烏龍事。

此外,二人提到因合作拍攝電影《變態殺人狂》而成為好友,張慧儀說:「同佢(關寶慧)開工,好多蝦碌事,日日笑,一坐埋就笑,都唔知笑咩,嗰次我第一次做女同志,我哋仲要接吻。」關寶慧續說:「係濕吻,我記得拍呢場戲,拍咗好耐都拍唔到,一埋牙我哋又笑,因為要同個好朋友喺度咀喎,笑到個導演都有少少嬲,其實我覺得有啲尷尬,後來就『死就死啦』,快啲拍完佢啦。」自這次咀戲後,二人從此變成「一對」。

關寶慧作客香港開電視節目《曬ya馬拉moi》。

節目尾聲,關寶慧跟大家分享了一個小秘密,她謂:「一路以來,在許可又唔尷尬嘅情況下,我有幫慧儀物色男友,佢咁靚又咁好,冇可能冇拖拍,所以如果我發現身邊有咩蛛絲馬跡(有合適嘅人),我會介紹俾佢。」

廖子妤與龔柯允一同品嚐一系列不同品種的馬拉榴槤。