【親親我好媽】何廣沛江嘉敏成最佳CP 險成天堂鳥:無綫多機會搏

撰文:
最後更新日期:

何廣沛其實同MKpop拉不上半點關係啦,而家係型!(符祥定攝)

《親親我好媽》近來掀起不少話題,除了江美儀、江嘉敏兩母女,其實被稱為2017年TVB小鮮肉何廣沛都是亮點,皆因他外表乖乖仔,今次就要做反叛少年,連佢自己都怕會Handle唔到。劇集出街之後,網民對何廣沛的評價正面,更指他與江嘉敏非常登對,表示:「整套戲最好睇係佢哋!」、「兩個人望落好清新自然」,還大讚「何廣沛愈睇愈靚仔」。回想何廣沛過往曾有機會加入俗稱MK pop組合「天堂鳥」,但後來因專注拍劇而無下文,如今在TVB形象正面被力捧,可算是無行錯路!

何廣沛雖然今次做壞男孩,但學佢話齋:「個樣乖,所以做咩都係乖。」因此網民的評價都正面。

提起之前有機會加入天堂鳥成為MKpop大軍,何廣沛輕描淡寫:「其實當時未成軍,都係同經理人傾一傾計,之後都有返去問公司,佢哋就話:『唔好啦,都係專心拍劇啦,大把劇畀你拍啦。』所以見完一次都冇下文。」而天堂鳥有一排都有風光過,曾經到內地上節目搵人仔,都算出過名。何廣沛對此就話:「其實大家各有各做啦,始終我唱歌又唔係叻,而喺TVB機會都大啲,加上我而家都有劇拍啦,所以又唔係話冇做(天堂鳥)會唔好。」不過,好多人都唔會好似何廣沛咁好彩,他就有一番見解:「係唔會咁好彩嘅,但入TVB有多啲機會去搏,呢套唔得就下一套再努力囉,我都相信成功唔係一日就得嘅。」

何廣沛最終選擇留在TVB,沒有被冠上MK之名,如今在《親親我好媽》與江嘉敏的演出,被讚是清新自然的組合,加上現在被公司力捧,可算是「塞翁失馬,焉之非福」。何廣沛透露事前沒有刻意去想與江嘉敏孖住上的化學作用有多大,因為拍此劇充滿壓力:「之前我拍《律政強人》、《財神駕到》,起碼都會有智叔(廖啟智)、豹哥(單立文)等等嘅前輩傍住我,但今套我對得最多嘅就係江嘉敏,好似勁快就要學滿師咁,加上江嘉敏第一次拍TVB劇,變咗我要全程都要lead住佢,所以都係會有壓力,唯有就將前輩教我嘅嘢盡我所能同江嘉敏講。」結果,現在反應都很正面,何廣沛的心機總算沒有白費。

何廣沛話今次與江嘉敏對得最多,要做返大哥哥,開導一下對方。

網民覺得佢哋好襯,因為好清新自然。(電視截圖)

不過,何廣沛就話自己有隱憂。雖然今次評價不錯,但一直以來他的聲線都成為網民討論的話題,一般都指太溫柔,會限制何廣沛所演的角色類型,他亦承認怕會變「御用乜乜乜」,但目前盡最大努力去改善:「有嘗試搵方法,例如啲發聲治療嘅,自己都搵到個方法,就等係《天命》嘅時候發揮下。」希望網民睇到何廣沛用心良苦,會講一句:「何廣沛原來都可以好man!」

其實何廣沛之前被提名過「最佳男配角」,已經開心到飛起,因為入行短短4年就獲提名,對他來說是很大的鼓勵。(符祥定攝)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。