張偉文染疫急送入院 區瑞強傳語音打氣：千祈要撐住，你要唱歌！
撰文：吳子生
出版：更新：
被封為「民歌王子」的區瑞強（Albert）今日（18/3）現身旺角音樂學校為課程《民歌結他彈唱班》舉行記者會。Albert表示：「其實點解我會開班教結他唱民歌呢？喺50年前嘅我未係歌手之前，我喺全職係結他導師。咁所以而家我好想將呢啲嘢傳承落去，尤其喺疫情呢段期間，可讓我有空間去諗我想做嘅嘢。話晒我都有40年冇落手去教人彈結他。而今次我哋搞呢個班，全程係透過互聯網上堂，而且同一時間係可以對幾個人，唔使好似以前咁要親身教一對一。而且而家我啲學生來自世界各地，遠至有冰島嘅學生，咁所以可以話係冇界限。」
區瑞強透露好友張偉文染疫後情況康復中。（羅國輝攝）
對於好友張偉文最前染疫入院，Albert表示他情況安好：「當我知道佢中咗之後，就即嘗試聯絡佢，但就搵唔到。但最終係佢周邊嘅人話我知佢嘅情況Ok。於是我就留話音訊俾佢同佢講：『你千祈要撐住，因為你要繼續唱歌呀』。我知佢一生人最鍾意唱歌，所以我就用呢樣嘢去鼓勵佢，希望佢可以快啲好康復起來。（幾耐冇見過佢？）都有成年。（有指張偉文晚年陷入經濟困難？）我諗佢冇嘅，因為佢需要唔多嘅，佢都係需要一啲基本嘅嘢，佢同我哋講都有啲積蓄。」
區瑞強今日出席宣傳活動。（羅國輝攝）