雪姨拍片講網上求職騙案 留言最精彩:你存在已經係騙案

撰文:鄺鈺瑩
出版:更新:

自從「盆菜風波」後,雪姨上月「復出」YouTube界,任憑網民圍剿、食店出聲明割蓆,但雪姨就好似開咗濾鏡一樣,完全睇唔到,繼續努力拍片。

雪姨最新一條片係講網上求職騙,但可信性受到質疑。(影片截圖)

雪姨日前又有新片,今次係講網上求職騙案,仲搵嚟受害人分享經過。成件事大致係受害人Shirley(化名)喺網上應徵投資公司文書助理 ,時薪120元,點知到最後原來係借出自己銀行戶口去借貸,Shirley話騙徒每次都係透過WhatsApp Call同佢聯絡,而最終佢分別喺兩間銀行、四間財務公司貸款2百萬,當中有40萬已經轉帳……

受害人話自己曾經轉帳到騙徙戶口,但都係得個「講」字,片中所有文件畫面都係構虛而成。(影片截圖)

呢類騙案《東張西望》都報道過N咁多次,咁由雪姨出片又有咩特別呢?特別在佢同受害人都真係用把口去講,完全冇提供過任何對話截圖、借貸文件、轉帳記錄等等,唔少網民都質疑其可信性,亦有指受害者語調輕鬆,完全唔似被人呃錢。

而且網民留言亦完全唔俾面,甚至直斥「你存在已經係騙案」,亦有留言問「盤菜既短片變左係生髮水既廣告,請問算是網上騙案嗎?」影片上載三日已經7百多個留言,但觀看人次只得3萬多,同雪姨過往嘅影片相比,可算係插水式。

+5