專訪︱Baby師妹潘藝桐原來係CEO 自認「虛報」身高:夜晚會矮啲

撰文:陳栢宇
出版:更新:

雖然楊怡、李彩華和羅仲謙主演的《家族榮耀》在無綫(TVB)翡翠台播畢已經一段時間,但劇集仍然有不少演員值得一提,例如飾演熊黛林細女的潘藝桐(Pearl)原來大有來頭,現年26歲的她不但是名校畢業兼身兼公司CEO,更是紅到發紫的Angelababy(楊穎)同門師妹。Pearl日前接受《香港01》專訪時,便大談過往經歷,以及入行一年多的感受。

潘藝桐日前接受《香港01》專訪。(梁碧玲攝)

「其實我係唔讀得書,大家誤會係因為我間學校Queen Mary(倫敦瑪麗女王大學,Queen Mary University of London)有科係神科,係讀醫,好似係世界頭十名以內,而我係讀Business Management(商業管理),所以係比較易考入。」本身在德望學校讀書的她,自言出身自小康之家,提起13歲遠赴英倫求學,她坦言起行前以為世界只有讀書一件事:「之前我星期一至日都係補緊習,因為我讀書唔係特別叻,去到英國先發現,原來有好多唔關讀書嘅嘢我可以做,例如課外活動,去學煮嘢食,我可以去學舞台劇,我可以去到騎馬,我去到英國,我爹哋媽咪以為我咁細個會傷心啦,日日喊住打番屋企,結果我係開心到唔記得打畀佢哋。」

點擊下圖觀看專訪靚相:

+10

讀寄宿學校的Pearl接觸過戲劇後便找到了人生志向,但為何不是順理成章讀演戲?她坦言一切與安全感有關:「我係金牛座性格,成日諗做呢行會唔會好Insecure(不安全),會唔會冇收入,先喺大學決定讀Business Management,學識做生意,等自己財政穩定,咁我就可以追尋我嘅夢想。」所以她早在大學三年級時,已經與朋友開設活動策劃公司「Le Lumière Events」,現時不但在香港有基地,在上海和巴黎都有辦公室,讓她可以投身演藝事業無後顧之憂。

點擊下圖觀看Pearl的IG靚相:

+18

想入行和入到行從來都是兩回事,雖然Pearl堅持追夢,並在大學畢業後再赴上海戲劇學院進修戲劇,及後亦到深圳擔任戲劇老師,但還是與正式踏入娛樂圈有一段距離:「係到我返英國探哥哥時,就上咗YouTube節目《倫敦街頭邱比特》,同一時間騰訊又搵我拍《心動的信號》,然後經理人Kim(周優根)就經共同朋友問我可唔可以見個面,我發現呢度資源好好,同事又Nice,公司運作又透明,所以就簽約正式入行。」

潘藝桐笑談「虛報」身高經過。(梁碧玲攝)

談到Pearl在《倫敦街頭邱比特》中自稱身高170cm,她笑住話沒有想過會有人信以為真:「其實我係笑住咁講自己170cm,我應該作大啲,我以為170cm已經冇人信,點知真係有人信,原來我個樣都生得幾高!(真實身高係幾多?)朝早同夜晚有分別,大概係157.534789567cm咁啦,呢個係朝早,夜晚就矮番啲啲,哈哈!(覺唔覺工作機會受身高限制?)都有少少,例如Cast警察角色咁,冇理由塞好多增高鞋墊嘛!不過,大體上我又唔覺得限制好多,反而我覺得細粒係我嘅個人特色,呢一行細粒嘅人唔係真係咁多。」提到目標,她坦言自己仍然是新人所以還要努力建立形象:「我想拍多啲可以展示自己性格嘅綜藝節目,或者接觸更多唔同角色,殺人犯我都想做!」

服裝提供:Ports Pure