【迷】何啟南原來係暖男 屈Dee哥拍拖4年再婚:結婚有咩好驚?

撰文:
最後更新日期:

何啟南在《迷》劇中飾演屈Dee哥,心狠手辣,但現實中是一位暖男。

繼鷲哥之後,這陣子最強奸角一定是《迷》入面的屈Dee哥(何啟南飾),殺人不眨眼,在劇中迫到田蕊妮就快黐綫,真係看得人心寒,不過現實中的何啟南其實是鐵漢柔情,最近低調入紙再婚,和拍拖4年的女友楊穎靜低調入紙結婚,何啟南接受《香港01》訪問時說:「其實冇咩特別啫,結婚有咩好驚?遇到啱嘅就使等,我唔識浪漫㗎,但佢都唔介意,送花?有,佢叫咗幾次喎,點可以唔識做㗎。」劇中屈Dee哥霸氣十足,冇人敢向他Say No,但現實中的何啟南反而女友優先,他說:「兩個人嗌交緊有,一齊嘈就冇意思,我唔會,等佢下咗啖火先,之後再慢慢傾,佢都好明白事理㗎,好難得揾到一個啱嘅人,我一定要俾個名份佢,都要為佢諗,等佢同家人有個交待麻。」

 

何啟男和女友何楊穎靜已低調入紙結婚,給女友一個名份,果然真男人。

何啟南感情穩定,反而在無綫工作,他就感覺未能掌握,他說:「呢次有屈Dee哥,但下次佢可能派你做其他戲份冇咁重嘅角色,但我都要做,因為你唔做,就可能還唔到騷,所以我哋其實好被動,以前我唔想做奸人㗎,但我入嚟tvb咁耐都好似剩係做奸人,第一次做奸人好似係《陀槍師姐》,當時我做古惑仔,古仔(古天樂)都話:你條友都幾似喎……𠲖家我想要嘅係更多工作機會,繼續做奸人冇問題,但如果有其他角色俾我玩就更好啦,最緊要有工開。」

 

何啟南當時20歲已是電影《操行零分》男主角。

資深的電影迷或會記得何啟南曾經是電影的當紅小生,拍過《操行0分》《警賊兄弟》,揾錢曾經非常容易,初入來TVB重頭做起,其實不容易,他說:「細個唔識諗,拍部戲收5萬蚊,當時30零萬一層樓,但我攞哂啲錢去玩,買車呀,飲飲食食,如果當時我攞哂嚟買樓?哈哈!我𠵱家就真係屈Dee哥喇!到嚟無綫重新嚟過,初頭得8,9千蚊,交租都冇咗4500,我好記得,好想返工,因為唔駛駛錢,又有飯食,冇工開嘅日子,自己匿埋係屋企,係咁問自己點解會咁,不過後尾冇諗喇,做好眼前嘅嘢最實制,𠲖家幾好呀,keep住有工開,頒獎禮?如果有份梗係開心啦,冇都唔緊要,最梗要有嘢做。」

《心戰》何啟南飾演陳豪其中一隻心魔,劇中經常爆肌。

上年《Sunday好戲王》何啟南獲曾志偉頒《另類好戲王》獎,網友稱他為御用奸人。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。