鄧麗欣重提戀事稱「揀錯人」 方力申不信是真心：當時我係男主角
撰文：吳子生
出版：更新：
方力申（小方）今日（31/5）現身旺角出席藝術展覽揭幕禮。提到舊愛鄧麗欣（Stephy）日前在張敬軒演唱會做嘉賓時，被軒仔擺上枱重提昔日與小方的戀情，鄧麗欣笑指當時「揀錯人」。
方力申透露與鄧麗欣仍有聯絡。（陳順禎攝）
小方笑言：「咁啱呢個新聞一出呢，第二日我同Stephy連同其他朋友一齊為一名圈外人慶祝生日，而本身我就冇諗過攞出嚟講嘅，但最終我忍唔住都同佢講咗一句，話我都睇到你喺台上講嘅嘢，話揀錯阿力。然之後佢就笑一笑話：『冇嘢嘅，你都明㗎啦！』跟住成班人都係度笑。其實咁多年嚟我同佢EQ都好高，由得大家講繼續笑。（會否覺得對方說揀錯人是真心話？）我⋯⋯我梗係唔覺得佢係真心啦！係咪先。鬼叫我當時係男主角咩，佢唔揀我，佢可以揀邊個呀！」
方力申今日出席藝術展覽揭幕禮。（陳順禎攝）