回歸|與游嘉欣床戲吸睛 吳偉豪拍攝前努力做掌上壓谷胸

撰文:洪曉璇
出版:更新:

《回歸》昨晚重頭戲絕對是區家謙(吳偉豪飾)及安若彤(游嘉欣飾)的「床戲」。劇情之前一直未有交代家謙醉酒當晚詳情,直到昨晚終「真相大白」,彤彤與家謙原來並未發生任何越線行為,整場戲只是飲醉了的家謙攬著彤彤細訴自己有多寂寞和不甘,期間更不經意答應可做彤彤男友,所以彤彤由始至終感失望的,只是家謙忘記了「拍拖」的承諾。

游嘉欣嘅單眼表情,相當古惑。

「謙彤」床戲雖然只是簡單的攬攬抱抱,但已令兩位主角大為尷尬。觀乎官方釋出的拍攝花絮照,吳偉豪(Ricco)與游游拍攝跌坐床上戲份時,數秒之內「紅都臉晒」,相當誇張,事後Ricco坦言感尷尬:「始終都係第一次拍啲咁親密嘅戲,自己又未至於好易面紅,但喺一班20幾人嘅crew面前,同一個異性有親密嘅接觸,都好難唔尷尬。」Ricco笑指是去到看劇本時,才得悉自己有剝衫場面:「我當堂嚇一跳,然後得啖笑。好彩我平時都有做吓運動同keep fit,拍嗰日就再臨急抱佛腳做吓掌上壓咁。」家謙隨著劇情發展逐步覺醒愛上彤彤、因而做出不少呷醋式霸道舉動,既幼稚又可愛,獲網民封為「霸道總裁」,網民更指謙彤CP有韓劇Feel。

二人鏡頭背後笑得好開心,睇嚟呢場戲大大拉近咗佢哋嘅距離。

至於出盡全力阻止「霸道家謙」揭發「醉酒實錄」的彤彤,由於與家謙的角力戰古怪藉口兼搞笑表情多多,獲網民讚演技再升呢。談到床戲,游游亦直認尷尬謂:「我同Ricco開工冇耐就要拍呢場戲,我哋本身之前又冇乜接觸過,所以真係幾尷尬。但因為拍呢場戲時已經夜深,所以就算頭幾take有啲怕醜,去到後面已經攰到唔識得怕醜。因為場戲要孭住Ricco行再將佢撻落梳化,我真係要用盡全身嘅力先可以將佢撻到落去,實在太重喇。」

呢幕由門口行到去客廳嘅戲,游游話拍得好辛苦,因為吳偉豪好重呀。

另張萊(戴祖儀飾)昨晚被爆「黑歷史」,陳年「豬妹」Look曝光震驚IT界,由「IT界女神」降呢「IT界林雪」;之後又因捲入網路犯罪被捕,慘遭隊友等連環割席,網民看得肉緊。此外孫漢霖飾演的方佑俊亦因逐步黑化成功搶灘,網民指其在劇中有發揮之餘,亦大讚他奸得入型入格,令人眼前一亮。

+38