中大學生fb直播竹戰　師兄森美力撐：遊戲本質冇賭博成分

大學生拉大隊捉Pokemon冇問題，一齊去唱K聯誼，亦未嘗不可，但若然四人圍攻四方城，大玩中國傳統國粹「麻雀」，卻往往被視為「荒廢學業」、「沉迷賭博」。其實144隻麻將組合有多個變化，又包含了猜測對方叫緊什麼糊的心理戰，無疑是一門高深的智力遊戲。數月前成立的中文大學學生會麻雀研究學會，今日（25日）舉行了「雀皇之皇麻雀大賽」，更在Facebook實況直播賽事，大學生竹戰聯誼究竟對或錯，《香港01》訪問了中大畢業的圈中藝人，他們也力撐學生，認為不涉及賭錢，純粹只是遊戲。

森美

商台DJ森美承認對打麻將認識不深，只是知道「清一色」、「對對糊」等術語，但他卻力撐麻雀學會的大學生，「我贊成喎，要賭錢任何嘢都可以賭錢啦，包剪揼都可以賭錢喎，其實嗰個遊戲本質冇賭博成分。(一般人打麻雀普遍都會賭錢？)任何遊戲都可以加賭博成分啦，足球都可以有賭博成分，唔通學校冇校隊踢足球咩？中文大學裡面都有球場畀人踢波啦，兩隊踢波又唔俾囉喎？（學生打牌時會計分！）足球都會計分啦，裡面冇涉及賭錢成份就應該可以囉。」

不過話分兩頭，森美表示亦要尊重學校的規則，他表示：「當然亦都有第二啲情況啦，例如宿舍裡面唔俾打牌。呢個又另計喎，我覺得提供一個住宿畀你，訂立一啲規矩，亦都係應分嘅，例如喺宿舍裡面唔俾踢波，因為有機會踢爛嘢，宿舍裡面打牌可能會嘈到其他人，絕對唔係因為博賭成分，所以學校有啲地方唔適合打牌，我可以接受，例如上堂嘅班房，會影響到其他同學。同學要打牌可能要喺多用途室，作為一個game嘅學問去研究，我覺得冇問題嘅。」

高皓正

對於中大學生在學校打麻雀，高皓正認為沒有對或錯，但最緊要同學校溝通好，「呢個情形比較尷尬，因為好多人用麻雀嚟賭博，其實好多人都用啤牌賭博啦，係咪就唔可以玩啤牌呢？但每個地方都有傳統文化，如果學校一直係唔俾打牌，都應該尊重傳統嘅。（若在學校範圍外，大學生打麻雀有冇問題？）佢哋都係成年人，喺學校範圍外，絕對係佢哋自由啦，但所有嘢都唔好沉迷囉。」說到底打麻雀也是傳統智力遊戲，只要不涉及賭博，打返幾圈放鬆一吓，也無可厚非。