做足20年離開TVB 陳琪:好角色唔知要等到幾時

撰文:
最後更新日期:

一份工作持續了二十年,在一個圈子待了那麼久,現今有一個名詞叫「舒適圈」,留下容易,離開很難。陳琪在學期間已經去TVB面試,一畢業就踏入TVB,一直在公仔箱這個圈子真真實實地演了二十年戲,還有數個月就有服務金牌,你有記得過她的角色嗎?從《真情》中的阿霞,到比較有迴響的《突圍行動》飾演黃寶如,再到剛剛播完的《親親我好媽》原來她都有份演出。琪琪飾演的角色都不太出位,甚至你看到她也只能以「好熟口面」來形容,或者叫她一聲「胡太」,因為她的好老公胡諾言也是TVB的藝人。

你知道她的名字是陳琪嗎?(網上截圖)

昨天,琪琪在自己的Facebook以Live宣佈,自己拍完最後一幕《深宮計》便會正式離開TVB。她的粉絲自然是第一個得知這個消息的人,到報導出街了再陸續有人致電問她,有關心的,有恭喜的,各各款款的電話收個不停。當中最令人關注當然是生活問題,一家五口三個小朋友,只有老公繼續拍劇搵食,會否唔夠使?琪琪笑說:「如果係唔夠使就一早唔夠使喇,都唔爭在。我離開TVB老公都無意見,老公都笑我不嬲都無收入架喇,如果有收入就唔會離開TVB喇。其實我哋成家人都好隨遇而安,好多嘢都船到橋頭自然直,勉強唔嚟,最緊要自己開心喇,我仲叫佢俾心機啲做添。」關於老公,她說自己找到個絕世好男人:「其實好難架喺電視台執到佢,我要求嘅唔係個好有經濟能力嘅人去照顧我,反而係搵一個逐步逐步去建立人生每一步嘅人同我去行。如果我要搵一個經濟能力照顧我嘅佢未必係,但佢絕對係一個真心嘅人,唔係咁多男人做得到。而家我好滿足架喇。」

有個好老公,琪琪已經好滿足。(陳琪Facebook)

離開TVB,琪琪自覺其實跟粉絲的距離十分相近,發現自己在Facebook推介的產品都有不少人支持。現在潮流興網絡紅人(KOL),令到琪琪有向這個方面的新看法,大家雖然未必再能夠在電視螢光幕看到自己,不過可以從另一個(電腦)螢幕繼續與她交流,「有時啲媽咪都會有啲奶粉呀,湊仔問題問我,但都未必答得咁多,所以不如一次過group埋一齊開一個live,答晒咁多個朋友嘅問題。」她並不擔心未來的日子,其實TVB都有跟琪琪傾新合約,不過大家對大家的要求未必一樣,亦不想雙方都產生壓力,所以便毅然離開TVB。

琪琪不時都會在Facebook開live,向著KOL這方向進發。(陳琪Facebook)

能夠拍劇拍足二十年,對演戲當然有一份熱誠,琪琪說:「希望將來都仲會有其他平台去演戲,其實我一話唔做,啲人就猛話你好戲,平時未必發覺有咁多人想睇你做戲。作為一個演員,自己對演戲係有興趣,有期盼嘅,只不過唔知係咪生咗太多小朋友,啲監製開始唔記得咗原來世界仲有個陳琪喺度。呢個世界好得意,你有做嗰陣,啲人會話咁少見你,仲以為你已經無簽約。但當你真係唔簽嘅時候,又會問你點解唔簽呀,唔好唔簽喇,咁我咪見你唔到囉。咁我話其實平時你地(監製)都唔係好搵我做嘢,有時都有啲失望架。」轉換環境,其實是希望找回自己喜歡做的東西。

《深宮計》是琪琪最後一部劇,演一個窮家婦孺。(陳琪Facebook)

近幾年,琪琪每年都只有一兩部劇的演出,會否與照顧仔女有關?琪琪就覺得未必這樣:「其實又唔係喎,因為都無特別嘅角色搵我演出,不過都好多謝台上幕後的朋友和監製,佢哋會話我演得好好,好好戲喎,但問題係無啱我嘅角色。咁死喇,有時我就喺度諗,咁啱我嘅角色要幾時先出現?你唔知要等到幾時架嘛。唔啱佢哋又唔會搵我做,有時啲幕後朋友話我係一間好好味又平嘅餐廳,不過無人幫襯。其實我都知幕後嘅朋友都有佢哋嘅壓力,可能佢哋都為我設想,驚阻住我湊仔。」做電視不能賺大錢,琪琪深明這個道理,所以她演戲最想找的是滿足感,離開也是這個原因。以後還會否再拍戲,琪琪說到不要說ViuTv,港台找她也會盡力去拍。她要求的不是待遇,而是一個好角色。剛剛她老公在排演舞台劇,她也有跟老公說叫監製有機會可以給她一來個角色,出身演藝的琪琪,原來對舞台劇的熱誠還在。路,從來都不易行,人生路如是,演藝路更甚。不過琪琪看得開,並沒有把這些事看得很重。走,也要走得灑脫。

三個小朋友都好得意。(圖片來自陳琪)

現在琪琪暫時可以專心湊小朋友。(圖片來自陳琪)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。