《千奇百趣特工隊》聲演 無綫新配音王馬家豪:保全叔無人可代替

撰文:
最後更新日期:

最近播完的《千奇百趣特工隊》,裡面有一把旁白聽落有七分似周星馳的聲音,相信大家都會留下一點印象。以往的《千奇百趣》系列,一直由以故著名配音員林保全做旁白,一把叮噹聲深入民心。那麼究竟這位聲音酷似星爺的配音員又是何方神聖呢?

原來《千奇百趣特工特》入面旁白把聲就係佢-馬家豪。

原來他叫馬家豪(Terence),入行做配音員只有短短兩三年的時間,記者出身的他對演藝圈已經有一定的熟悉。至於入行純粹因為興趣,當時報了一個配音班,上了三堂便被導師發現其潛質,開始要他接手配音工作。「一開頭配吓啲日劇呀,卡通片呀,漸漸地就同配音扯上咗關係。跟住入到電視台做嘢,因為我喺娛樂新聞台做嘢多啲,咁我自己會做埋配音工作。咁可能啲監制聽到我把聲都ok喎,都幾賤格吓喎,不如就幫啲綜藝節目搞吓笑咁囉。」他還不時以周星馳腔說話,場面搞笑。

Terence會形容自己指聲為賤賤格格,不過真係幾似星爺。

如果想入配音這行業又有甚麼方法呢?Terence謙虛地說:「其實我入行都唔係好耐,但如果真係鍾意配音,而家有好多網絡可以用一啲片,喺屋企自己試吓用mic配吓音。如果試完真係有興趣,坊間都有好多訓練班,其實TVB都有,不妨去報吓名。其實配音有好多種,好似我會配綜藝節目,玩嘢嘅程度又可以大啲。」

 

配音是走輪更制工作,Terence笑說每一份工作都有辛苦的地方,有時想不到怎樣去演繹一個聲音,就唯有帶返屋企慢慢諗,原來配音員都要回家OT。配音員最重要的當然是聲音,如何可以將自己的聲音保持最佳狀態呢?他說:「其實無乜keep聲,通常開工前會飲啲暖水,令到個喉嚨舒緩啲,已經係可以應付工作所需。有無俾人話過?配得好差就成日都有咁講,因為我自己把聲有時簿啲,可能啲前輩會同我講不如放鬆啲放輕啲,用返自己把聲先,唔好一嚟就chok聲。因為咁會好傷喉嚨,之後再想有變聲就難啲有變化。」他表示花師奶(聲演花師奶的配音員)都有經常提醒他,例如不要跟Mic太近,還試過他們自己離開錄音室,等Terence減少壓力,令到他都會有少少尷尬。

初初入行難免會有配得差嘅情況,好彩都有唔少前輩指導佢。

配音可以有很多元化,除了TVB劇集、卡通片、綜藝等之外,坊間都有很多廣告、電影等等。對於配音,Terence表明自己還有很長的路要行,做多點不同的變化,例如試多一點不同的聲音,再老練一些。談起配音界經典保全叔,Terrance表示十分尊重這位老前輩:「雖然我無機會同佢合作過,他是配音界的一位大前輩,佢把聲已經深入民心。除咗多啦A夢之外,從佢以前洪金寶電影我已經聽佢把聲。保全叔接班人?諗都無諗過,佢係唔可以有人取代。同埋多啦A夢聲音做《千奇百趣》已經八、九輯,其實已經入晒觀眾個腦。所以當初監制搵我做呢個節目都真係有少少驚,因為背負住保全叔呢個名,唔係咁易去做。」

Terence表示保全叔的地位是無可取替的。

訪問當中,發現原來Terence除了扮星爺聲音有一手,扮黎明都十分相似。配音以外,他對唱歌都十分有興趣,而公司亦得知他的心願而為他出作安排。當時黎明在中環開演唱會,公司安排了Terence在黎明開騷前到門外唱歌給入場者聽,當時反應都不錯。對於這件事Terence已經覺得完成了自己所想的事,一件好像很傻事,但做過後無悔,便足夠了。唱歌如是,配音如是,做人亦如是,堅持自己的想念,一定可以做出自己的路,Terence現在不就是正正向自己的路邁進嗎?



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。