岑珈其16歲時首次參演電影《烈日當空》，其後他不斷客串多部電影或劇集，並同時做倉務員、保險經紀以維持生計，直到8年後，岑珈其因電影《點五步》而開始為人熟悉。

岑珈其近日接受港台節目《安哥同學會》訪問時，提到自己既冇讀過演藝表演，而且又唔係高大靚仔，所以不時都要搲撈，但慶幸自己性格樂天，所以就算受盡白眼都不會感到太難受。「到今時今日，行入面熟我嘅人都知道，岑珈其最出名係搲撈，啲人可能諗咁會唔會好核突，但我從來都唔覺。不過其實我都係人，我都面要，但點解我會願意搲撈，係因為如果我真係咁愛呢個職業，如果咁易就怕，有咩資格講我愛？搲撈有幾難受先？最多比人白眼、喺背後笑、或者比人覺得煩，但如果搲撈成功，就爭取到機會。我成日同自己講，搲撈唔緊要，最重要係搲到之後，有冇好好珍惜個機會。」

節目中，岑珈其亦有提到早前電影《緣路山旮旯》上映後，以「樣衰令你難受唔好意思」回應網民的批評，獲讚大方得體，他表示就算再有機會都依然會咁做，並謂：「永遠都有唔同人、有唔同的聲音，我唯一可以做，就係做好自己。」