美麗戰場｜蔣家晏演反派奸到出汁網民睇到激心：好彩冇收死亡恐嚇

由葉念琛擔任監製、導演和編劇的無綫（TVB）台慶劇《美麗戰場》首播至今好評不斷，再次掀起一股追劇潮。劇中蔣家旻飾演的大反派角色「鍾家琪」喪盡天良奸到出汁，令網民睇到眼火爆，紛紛在網上留言鬧爆：「人渣」、「好憎你」等。今日（8/10）大奸角「琪琪」蔣家旻現身新城電台為《美麗戰場》宣傳造勢。

蔣家旻表示：「其實入行以來我都冇諗過一定要做反派角色，但我係知道反派嘅討論度係好高，同埋個討論又會大啲。今次我同導演係冇諗過咁快就有咁高嘅討論，播到第二三集已經係瘋狂洗版式去報道。早兩日我返公司見到保安姐姐，佢第一時間好激動咁指住我：『你……你……呀』，我就問佢你係咪睇到好激氣？佢就話真係睇到好激氣，仲讚我做得好，所以我真係開心。（網民留言勁鬧你，有冇收死亡恐嚇？）哈哈，好彩冇收到死亡恐嚇。佢哋都係留言話好憎我，同埋話睇到想打爆部電視機。」