專訪︱點石成金一手捧紅Angelababy 經理人Kim Chou:簽人似溝女

撰文:陳栢宇
出版:更新:

人稱Kim Chou的周優根,來自台灣,紮根香港,是行內首屈一指的經理人,一手捧紅Angelababy(楊穎)、熊黛林等演藝名人,旗下的劉沛蘅(Hillary)、譚旻萱(Mandy)、林熙彤(Hazel)、任晴佳(Ella)、許恩怡(Natalie)和陳毅燊(ANSONBEAN)亦曝光不斷,愈來愈多人認識,單單用「有眼光」三個字已經不足以形容,說她懂得「點石成金」應該更為貼切,雖然世有伯樂然後才有千里馬,可是Kim卻不敢居功,更謙稱所有成績都是藝人努力賺取:「其實唔叻,一切都係係公司每一位同事嘅功勞,而我哋都係參與佢哋(一班藝人)夢想嘅小天使。」當然,夢想人皆有之,但不是每一位懷抱着明星夢的人都可以得到Kim青睞,所以有夢想絕非簽入「Cool Style」的充份條件,到底如何才會得到她睇中?她又是如何捧紅一個又一個明星?Kim接受《香港01》專訪時便自我解剖所有秘密。
撰文:陳栢宇
攝影:梁碧玲

Angelababy、熊黛林經理人Kim Chou早前接受《香港01》訪問,分享「揀蟀」條件,以及捧紅明星的方程式。

簽人如溝女

時代變,人物風景都改變,Kim坦言以前「揀蟀」的方法和今時今日截然不同:「有好多人會寄信嚟我度,咁我就會睇相,睇完相覺得唔錯就會見真人,當時執相嘅情況冇而家咁嚴重,但點都要見真人,因為好多人都識加Soft,費事貨不對辦。(而家都係咁?)而家我都唔見喇,真係好多貨不對辦,因為而家執相咁犀利,而家係見過真人覺得呢個人唔錯,同事就會去溝佢。」

沒錯,是「溝」,「溝女」的「溝」,Kim笑稱簽人與男仔追女仔無異,都是先心動後行動的過程:「你見到佢第一眼,你覺得呢個女仔好正,不過你唔會即刻想簽佢,你會睇一睇先,跟住就開始搵下佢資料,然後再接觸下佢,睇下大家傾唔傾到偈,從傾偈嘅過程了解對方多少少,有啲人靚到不得了但係唔適合呢一行,傾完偈之後你對呢個人有分數,之後我就會將佢擺喺我邊個Picture,因為個個人都唔同,而Market亦需要唔同嘅人。」談起追女仔趣事,不得不提簽入Angelababy時的經過:「Baby係佢同學寄佢嘅相嚟畀我,我睇佢張相,我就覺得,咦,幾靚喎,不過當然又驚貨不對辦,點都要叫上嚟見一見先,當然佢就見咗我同事先,我啲同事見到之後就衝入嚟話畀我知,呢個女仔,你見一見好。」

Kim直指簽人像溝女,首先心動之後行動,又要起底又要傾偈摸底,人靚並非大晒。

面試官反被面試

當時Angelababy只有14歲,還是一名初中生,但Kim見到她已經非常上鏡,試影相時面對鏡頭更是淡定,沒有一般人那種「扭扭擰擰」,所以好快就「扑鎚」決定羅致對方:「佢話有興趣,不過要返去問媽咪。」一段時間之後,Angelababy果然攜母再次登門,Kim先向楊母講完公司背景,再談到她的部署、配套,當見到對方和顏悅色,聽到對方話「阿女喜歡就得」,以為水到渠成時,豈料對方說:「不過我都要返去問嫲嫲。」

「原來係我俾人Cast,唔係我Cast佢。」回想起那段經歷,Kim拋出這個結論,而事實上Kim的確似被面試多過Angelababy一方。「跟住我就等到嗰日嫲嫲嚟,白衫白褲短頭髮,成個Fashion Designer咁樣,仲要係好有New York味道嗰種,仲好記得佢好似一陣風咁行入嚟,真係忍唔住「Wow」一聲。然後嫲嫲就話『好簡單,我哋屋企呢,就唔需要孫女入娛樂圈嘅,佢係我最寶貴嘅孫女,如果佢想,我畀佢玩,但係成績唔好,就唔可以玩』,我話OK。」是因為Kim看得到當年的Angelababy是一塊未經琢磨的石中寶玉,所以她才肯放下身段博個機會,而她後來亦發現自己沒有看錯:「佢工作態度好好,佢鏡頭敏感度好好,同埋佢好努力,你對佢嘅要求,佢可以做到,同埋佢好唔怕辛苦,愈同佢合作,就愈覺得佢有無限可能。」Kim提議Angelababy進軍日本市場,結果她在當地爆紅,Kim提議她拍戲吸收經驗,結果她在夏永康執導《全城熱戀熱辣辣》令人眼前一亮,為日後開拓內地市場奠下基礎。

Kim笑稱當年簽Angelababy,反而像被對方家人面試。(Instagram/@kim1113)

Kim簽入熊黛林亦有一段古,提到外界一直有傳她當年在上海時是「三顧草廬」請對方來港,Kim即說:「唔止三次呀!到真係應承之前,佢都係畀面嚟見下我咋!」她坦言熊黛林當初未答應轉戰香港,是因為她性格比較穩定,不愛貿然改變:「其實佢而家都係咁,初初時嚟香港時我覺得佢住得太遠,我就叫佢搬去我屋企附近,方便照顧,跟住愈搬愈近我,因為覺得佢真係食得太差,佢無辣不歡,搞到嗰時皮膚好差,我叫佢去我屋企食,但其實我屋企工人係煮得好難食,難食到不得了,仲好記得佢問我可唔可以就咁畀白飯佢,哈哈!」

Kim和熊黛林老友鬼鬼,原來當年簽她的過程也絕不輕易。(Instagram/@kim1113)

最棘手經驗

不要以為上述兩大王牌稱得上難簽,Kim在訪問中便揞名分享了兩個經歷千辛萬苦才搞掂的例子,其中一位藝人條件雖然很好,但因為被前公司蹉跎歲月,搞到對「經理人公司」這件事失去信心,就算Kim方面用一年時間與其接觸,對方仍然對他們有所保留,好在後來雙方有機會合作,清楚Kim有心經營,所以才肯敞開心房決定簽約:「另一個就係條件太好個個都爭,成件事好似同其他公司玩Show Hand咁,都幾痛苦,唔知佢係要錢定係其他嘢,我畀埋個Plan佢,等佢自己諗、自己揀,隔咗段時間我都打定輸數,到後尾佢突然有一日話OK。」

簽完約就一天都光晒?非也,所有工作在簽訂合約後才剛剛正式開始,就算你有一連串計劃,但計劃永遠都趕不及變化:「我哋係幫你包裝,幫你鋪排,然後你要跟住行,你要信我,我要信你,信你可以做到,咁你就要努力去做,你要令自己多啲人識,你係要攞到更好嘅工作機會,我覺得Team Work好重要,所以我成日話我好好彩,公司同事個個都好幫手。(成功例子咁多,會唔會有捷徑或者方程式?)一個人要紅、多人識,其實未必一定要好靚,最緊要係有自信,自信就係一種美,自信就係最靚,自信加勤力就係捷徑。」

Kim育有兩位千金,問她們有否考慮入行,她說:「佢哋入唔入行唔到我話事,佢哋自己決定自己嘅前途。」(Instagram/@kim1113)

「我仲喺上面」

現代社會,瞬息萬變,尤其是娛樂圈,今日紅這位,明天就到那位彈起,Kim坦言現在的經營方法,比起當年初初做模特兒、藝人管理時已經差天共地:「一路都要轉型,轉型係好難,以為我哋主要做Model,跟住有幾個Artist,或者Celebrity,而家就淨係做Artist。我覺得係一個學習,同時係帶啲新嘢畀影視圈,就係有啲新人識做戲,不過係好Fresh,你見到我哋公司嘅Artist係比較識打扮,同埋比較唔一樣。(點樣幫佢哋宣傳都同以前好唔同?)而家淨係用手機,咩都要快,同埋問心,大家鍾意睇嘅嘢都唔一樣,有人鍾意睇字,有人鍾意睇圖,有啲人鍾意睇片,選擇太多,你做YouTube要拍片,你要好知自己係拍畀咩人睇。(有冇一刻覺得自己追唔切?)我年紀係唔細,但我仲追得到,我相信自己仲喺上面,呢樣嘢我有信心。」

的確,Kim近年繼續成功捧起不少女生,證明她追得切大趨勢,當中最顯著的例子絕對是Hillary,提到她之前在綜藝節目《膠戰》和劇集《家族榮耀》中非常亮眼,Kim便指她在兩者中表現不錯:「《膠戰》就畀到大家睇到佢好可愛、好Sweet嘅一面,而佢喺《家族榮耀》演反叛少女都係唔錯,當然仲有大把進步空間!(佢入行14年先彈起,有啲耐?)佢摸索期係有啲長,好彩佢都好Lucky,佢都Keep住有嘢做,人唔同嘅時候就係要有唔同嘅進步,咁當然,市場都係講求天時地利人和,之前機會未必去到佢度,但其實佢係好好,做嘢好努力,呢種女仔喺香港唔多,佢嘅靚係畀到你一個好舒服嘅感覺,同時佢性格又係乜都冇所謂,真係好似一個Angel咁。」現在她在行內站穩陣腳,Kim亦倍感安慰。

Kim與Hillary情同母女,前者更大讚後者似足天使。