司徒瑞祈同無綫講再見 執包袱好輕鬆:locker十年冇開過

撰文:
最後更新日期:

阿水在Facebook講到自己正式離開TVB。(司徒瑞祈Facebook)

人稱阿水的司徒瑞祈於2004年以青春愛情劇《赤沙印記@四葉草2》出道,當時他以前香港游泳隊成員做賣點,一身陽光健碩外形,曾經迷倒萬千少女。不過他的星途一直平平,在TVB 13年間,拍劇產量僅得15套;加上2008年,阿水在賭場消遣時借貴利錢,連利息一共欠下80萬元。雖然他否認主動借錢,只承認在澳門賭錢受人誤導,自己也不斷四出籌措,向朋友籌錢還債。可是事件愈鬧愈大,債主不停追撃阿水,到他家人居所、經營的咖啡店,甚至是TVB電視城外牆淋紅油,當時此事甚為轟動。雖然阿水其後公開道歉,但他的事業就此插水,《仁心解碼》就是他最後一套有角色名字的劇集,自此就轉型做兒童節目主持。

不過,兒童節目主持都有分輕重。阿水所做的節目被安排到星期6、日這些炮灰時段播放,曝光率變相有等於無。他在2015年主持過《Y Angle》之後,就再沒有新作,一直被TVB投閒置散,其實坐着等合約完結走人而已。

10年冇開的locker。(司徒瑞祈Facebook)

司徒瑞祈與導演合照留念。(司徒瑞祈Facebook)

昨日阿水就在Facebook發文,正式向TVB說再見,結束13年的賓主關係。他Post了幾張在電視城的照片,並說:「江湖再見!個個都話你終於都捨得返嚟清嘢喇!唔好意思,我locker十年冇開過。以後唔好寄信去電視城俾我啦!」文末更打了幾句抒情句子:「#舒伯華德說:又回到最初的起點,記憶中你清澀的臉,我們終於來到這一天。」由此可見,阿水似乎與TVB的合約一早已經完結,可是平日較少出入TVB,終於回到公司執包袱,相信連自己Locker有啲咩都就快唔記得。不過,唯一肯定的,就是他那幾句抒情句子,反映他心情充滿感慨,因為終於要離開TVB。

與此同時,阿水20小時後,在Facebook又再post相,似乎透露着自己最新動向,文中提到他最近去到關島拍攝節目,叫大家7月留意ViuTV,而文中有落hashtag #挑戰1997,相信他為《挑戰1997》拍攝新一輯,阿水都唔愁冇嘢撈。

記者就致電話阿水,他說其實早在去年7、8月,主動同TVB講不再續約,到10月12日正式完約。唯獨這大半年都未有時間回TVB執包袱,阿水教住學生游水時回應:「(1,2,1,2預備)今次返去執Locker。與此同時,因為我今次返去要拎返TVB 10年長期服務金張支票,因為過咗半年就冇得拎,所以就返去拎,順便執嘢。」阿水最後一次返TVB,都冇特別話畀朋友知,在電視城見到幾個老朋友,就影下相留念,沒有甚麼特別。

問到十年冇開的Locker再度被解鎖,到底入面仲有啲乜?阿水就話:「都係fans寫畀我嘅信,好多都唔記得覆,都唔好意思。仲有公司之前畀我嘅信,好似請假、指劇之類嘅通知信咁。仲有我好耐之前代言過嘅運動品牌super X畀我嘅紀念品,有衫啊、袋咁囉,唔知而家個牌子執咗未呢?」記者因為咁Google過,係未執嘅。至於過去半年搞咩都返TVB,原來他正正就為ViuTV拍真人Show節目,大講自己過去20多年的運動生涯,「其實之前都有人搵過我去Viu幫手,但當時未完約,而今次keyman搵我,咁我就應承咗,因為我一直都好想拍。就係去關島跑馬拉松,打下沙排咁。」

之後又講到自己有新搞作。(司徒瑞祈Facebook)

阿水在locker搵到曾經代言過的運動品牌所送的禮物。(司徒瑞祈Facebook)

阿水當年在《四葉草2》嶄露頭角,陽光look都多女仔fans。(網上圖片)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。