【全職沒女】失戀幸得歐陽震華開解　姚瑩瑩：當時覺得乜都冇哂

得老友支持捱過情傷　

2000年，當時瑩瑩和拍拖8年的男朋友分手，對她打擊甚大，更有傳她患上厭食症，她穿婚紗宣傳《大囍之家》時，被記者追問感情狀況，姚瑩瑩一時感觸失控爆喊，更要主角袁潔瑩解圍。事隔17年，姚瑩瑩再穿婚紗宣傳《全職沒女》，沒有當日傷痛，面上滿面笑容，她的fb佈滿和兒子Evan開心的合照，瑩瑩說起往事亦淡然，她說：「而家諗返…this is my memory但我當時好脆弱，咁啱有個記者，我覺得佢無心啩？佢過嚟拍我膞頭，對我講：『妳瘦咗呀，唔好咁啦。』嘩！佢呢下攪到我嚟料，我唔知點解即刻崩潰喇，可能我屈住好耐喇，我覺得我好核突，點解我會break down，點解我唔夠硬淨，但嗰一刻我真係唔識堅強，嗰陣拍咗8年，（分手後有厭食症？）我都唔知係咪？我有食嘢，但嘔返出嚟，有時食完又唔舒服，當時阿Miu（陳妙瑛）、Bobby（歐陽震華）好睇住我，阿Miu當時話：『妳自己放pair啦，畀自己一個月、兩個月，第三個月就要企返喺身喇。我諗佢意思係叫我don’t think anything just do what you want，但我冇時間pair，因為我都要開工，但分開嗰下好突然，係度諗我嚟香港做乜呢？我留喺香港都係因為佢喺度，你都唔要我，我仲留喺到做咩？唔係話睇愛情好重，而係我嚟到香港，入咗TVB，得佢係我身邊人，我好似突然冇咗個親人，我冇親冇故，我喺香港好似一個孤兒咁，因為我屋企人都喺新加坡，所以當時覺得乜都冇哂。』」

失戀時朋友最重要，姚瑩瑩記起當時歐陽震華的安慰，她說：「有次我喺舊IP（清水灣電視城）開緊第二套，Bobby好似開緊《陀槍師姐》，我當時坐喺廠門口等埋位，發緊呆，Bobby見我一個人問我做乜事？佢叫我振作，啲人要走，俾佢走，唔係你嘅，就唔係你嘅，叫我唔好唔開心，快啲執返正自己，我話冇咗佢，唔知係度做乜，佢話我痴綫，你為自己嘛，為其他人生存㗎咩？其實𠵱家諗返轉頭，好儍，但呢啲真係當局者迷。Bobby好似我哥哥一樣，好錫我。」

時間係最好治療失戀的方法，姚瑩瑩亦慢慢走出低潮，她亦學懂瀟洒，她說：「我覺得兩個人相處，最重要坦白，如果你同我講『唔好意思，我鍾意咗第二個。』唔緊要你去執包袱走，I am OK with it ，我覺得人與人相處，到咗時間，可能就要分開，你坦白同我講，但你俾我發現，你死梗呀…哈哈，呢個年代冇話冇咗邊個唔得，兩個人有時可能時間到喇，times up就要分開，冇得勉強。兩個人唔開心，無謂拖累大家，我依家改變咗，你唔行出呢一步，you will never know what is coming for you，𠵱家最鍾要係同我個仔嘅相處，𠵱家唔講都唔記得咗喇，嗰個係我好break down嘅時候，今次再着婚紗宣傳，反而係擔心自己好腫呀，因為最近係頸椎問題，攪到我好腫，好似好肥咁，我剩係記得呢樣嘢，其他唔記得喇。」