張敬軒親口證實倫敦個唱飛炒高至8萬：我一個粉絲買咗

張敬軒今晚（20/1）現身尖沙咀出席賀歲電影《超神經械劫案下》首映禮。提到即於3月16、17日首次空降英國倫敦Royal Albert Hall，舉行《The Prime Classics HINS LIVE 演唱會》，日前（18/1）演唱會門票開售，15分鐘售完已兩場門票。之後網上已經有人將千幾蚊門券炒高三、四倍，更有傳有粉絲用8萬買落一張炒價飛。

軒仔親口證實確有其事：「其實係我一個粉絲買咗，而佢今日亦喺度，早知我自己唱俾佢聽啦，嚟我屋企問個價就得。（咁你個價係幾多呀？）哈哈，竟然有人問我價，我好開心呀。其實我哋呢啲係講心。（覺唔覺得粉絲用8萬蚊買飛會心痛？）我完全係唔同意咁做，咁所以今次我哋歌迷會係有幫佢哋買飛。大家對我嘅支持我係收到，大家要量力而為。」