專訪︱ANSONBEAN認迷信自爆着紅底褲催運:要追溯返《造星》時候

撰文:陳芷穎
出版:更新:

來到兔年的年初六(27/1),活力十足的ANSONBEAN(陳毅燊)就一邊砌全盒,一邊與《香港01》的讀者分享新年大計和小計。年紀輕輕的他大爆自己比屋企人更迷信,深信着紅底褲會帶來好運,所以除新年外,他幾乎每天都會着紅底褲,專訪當日亦不例外:「因為今日係比較認真嘅嘢,需要自信,着咗紅色底褲感覺上勁啲。」至於紅底褲催運的由來,ANSONBEAN說要追溯至三年前參加《全民造星III》時。

ANSONBEAN一邊砌全盒,一邊分享新年大計和小計。(葉志明攝)

詳談新年大小計 望年尾開演唱會兼出碟

談到新年大計,ANSONBEAN笑言有兩種,一種是專注在自己身上的「小計」,另一種則是工作上的大計。他先細談生活習慣上的小計:「自己想睇多啲書,打返多啲坐,等自己頭腦清晰啲。同埋培養返再好啲嘅生活習慣,上年係正常咁食加雞胸,今年食返白飯為主加啲雞胸。」而工作上的大計,他希望年尾能舉行演唱會及推出新碟,亦希望可以拍動作戲及挑戰演奸角:「演戲上想塑造奸角嘅形象,《怒火》我見謝霆鋒做得好入神,同埋做奸角好似更加好玩,試到唔同嘅嘢。除咗動作,都會想試多啲奸角嘅角色。」

砌全盒時,ANSONBEAN對各樣賀年食品的名稱和寓意顯得一知半解,場面搞笑。(葉志明攝)

跟從家中傳統年初一唔洗頭 自爆着紅底褲催運

砌全盒時,ANSONBEAN對各樣賀年食品的名稱和寓意顯得一知半解,他解釋全盒通常由家人預先準備,再加上他覺得全盒的食物不美味,所以沒有太大興趣:「我好少去問咩嚟,我細個多手食咗之後就覺得冇咩興趣啦。」雖然對全盒不了解,但ANSONBEAN卻會跟從家中傳統「年初一唔洗頭」,更自爆會着紅底褲催運:「唔係新年時都會着好多紅色底褲,而家要諗下點樣可以再紅啲,唔知...可能着(紅色)底衫。」

年紀輕輕的他大爆自己比屋企人更迷信,深信着紅底褲會帶來好運。(葉志明攝)

他續指自己比屋企人更在意要着紅底褲,至於為何會如此迷信,他指要追溯至三年前參加《全民造星III》時:「要追溯返《造星》時候,好似係嗰時開始着紅色底褲,嗰時Casting《造星》,我覺得係非常之難同埋好有挑戰性嘅事,係生命入面一個超大嘅任務,咁我要做足晒所有準備措拖。除咗上唱歌堂、跳舞,練啲動作之外,我要用埋少少旁門左道令到自己更加勁,着咗條紅色底褲運氣好似好啲。」

在場記者追問紅底褲的數量時,ANSONBEAN大方透露愈儲愈多:「而家有就嚟10條,一開始得兩條,一條係三角,一條係四方,但得兩條,啲表演一密時就會換唔切。(而家有10條可以日日着?)係㗎。(今日都係?)係㗎,因為今日係比較認真嘅嘢,需要自信,着咗紅色底褲感覺上勁啲。」

ANSONBEAN坦言在事業路上曾感到迷失和挫敗。(葉志明攝)

事業路上曾感迷失 學習在做自己與成長中取得平衡

紅底褲為ANSONBEAN增強信心,但他亦坦言在事業路上曾感到迷失和挫敗。2020年參加《全民造星III》奪季後正式出道,ANSONBEAN指第一年是摸索期、第二年開始發掘和嘗試做自己喜歡的音樂,而今年則是實踐期。對ANSONBEAN來說,最大的挫敗和迷失是如何在做自己與成長中取得平衡:「應該俾自己好似水咁咩都做,但會令到形象唔清楚…定要諗諗自己stand for啲咩,挫折位就係會好lost。市場、觀眾鍾意啲咩都會令到個藝人,覺得咁做會多啲views,不如就咁做,但同時就會迷失咗自己。如果我完全想做咩就做咩又會唔成長,諗下點樣成長得嚟,又唔會故步自封。」

髮型 : Derek Li @ Xenter Salon
化妝:Jenny Shih
造型:Daniel Cheung
服裝提供:yoox(jacket) 、Lanecrawford(shirt)、Farfetch(Pants & sneakers)
場地提供:China Tang Landmark

+9