大劉拍賣珍藏Hermès　小眾之選So Kelly竟然最多人叫價

劉鑾雄（大劉）與蘇富比合作拍賣珍藏手袋作慈善用途，第一部分共77個手袋，當中包括76個Hermès以及1個CHANEL，估值價值1631萬港幣。77個手袋日前已在蘇富比網站上架，大部分手袋已經有賣家出價，當中叫價次數最多嘅竟然並非大熱款Constance或Kelly，而係一個限量版嘅拚色、鴕鳥皮So Kelly，手袋本身估價2至3萬，目前叫價雖(至2月1日下午6時 下文叫價時間相同)然已經去到6萬，但如果以一個普通款So Kelly炒價都至少都4萬來說，呢個限量版確係值得入手。

而另外兩款較多人叫價嘅分別係Kelly Cut手拿包以及全場唯一一個CHANEL鱷魚皮手提包，前者估價2.6萬至3.5萬，現時叫價７萬；後者嘅同款手袋，喺外國二手網站全部都「缺貨中」，加上係鱷魚皮，睇嚟之後會有更多人出價。至於「全場」估價最貴（1百萬）嘅L鱷魚皮Birkin配鑽石、18K扣，就暫時無人問津。