AK江𤒹生否認封咪《冰上火花》後會出歌:拍完會專注返音樂

撰文:陳芷穎
出版:更新:

江𤒹生(AK)、陳卓賢(Ian)以及陳蕾(豹哥)將於5月14日於亞博舉行拉闊音樂會,三位今日(10/3)現身銅鑼灣時代廣場出席音樂會記招,吸引約500名粉絲到場支持,商場的二、三樓都迫滿人,場面熱鬧虛冚。活動上,他們即席大騷畫功,為對方的歌曲設計舞台,Ian收到AK為自己設計的《再見寧靜海》舞台時露出嫌棄表情,相當搞笑。

他們即席大騷畫功,為對方的歌曲設計舞台。(胡凱欣攝)
他們於活動後即將會討論音樂會rundown。(胡凱欣攝)

三位接受訪問時表示非常期待今次合作,豹哥說:「唔知佢哋啲歌加咗女聲係點,《地球上的最後一朵花》我都可以一齊Hoah-eh-oh,都好期待。」Ian隨即透露當初寫《地球上的最後一朵花》時曾幻想有一把女聲:「而家美夢成真,可以一齊合唱。」

IANSON合體出席活動。(胡凱欣攝)

AK早前宣布暫時唔出歌,令一眾粉絲非常擔心,他今日就大派定心丸:「呢幾月特登封一封咪,養一養把聲,希望到時有好表現。其實佢哋get錯咗,我只係話拍完嘢先,因為《冰上火花》太chur冇時間錄新歌,拍完就會專注返喺音樂度,封咪呢兩個字係大家加畀我㗎啫」,更透露希望可以趕得切在拉闊音樂會前出新歌。

AK否認封咪。(胡凱欣攝)

Ian亦因為拍劇導致手部輕微受傷,他表示冇咩事:「以前做慣運動員,真係好少事。」比起擦損,Ian坦言唔夠瞓仲大件事:「呢個攰啲,以前做運動員一日瞓十個鐘,消耗好多體力,呢排都係,上冰面要溜十幾個鐘,而家開始對腳有啲麻木咗所以都OK。」早前生病的Ian笑言同劇演員戥自己高興:「佢哋聽到Ian病咗,第一個反應係『咁就好啦』,覺得我終於可以休息下,(AK:幾時到我病)放咗幾日病假就快啲返去繼續。」

Ian表示剛剛收工就趕來記招。(胡凱欣攝)

今次與Ian和AK合作,豹哥笑言收到很多朋友請求幫忙買飛:「平時自己開都冇乜人問我攞飛,全部已讀不回住先啦,或者今次主辦唔係自己公司,有少少難攞呀,因為太多啦實在。」訪問期間,豹哥夾在兩位男神中間聽着他們一唱一和,問到會否覺得被轟炸時,她搞笑指:「都好過公司嗰兩個,我幾enjoy聽,因為覺得幾新鮮咁樣嘅對話,好鍾意佢哋嘅狀態,一個攻擊,一個就沉默咁反擊,夾喺中間都聽得好開心。」

他們非常期待與大家於音樂會上除口罩相見。(胡凱欣攝)
+5